Bynniew ba suki ka jingtrei, bthah ia ka NHIDCL ban pyndep hapoh ka por

Ka Meghalaya State Planning Board (MSPB) hynne ka sngi ka la pynpaw ka jingbynniaw haba ia dei bad ka jingslem ban pyndep ia ka surok Shillong-Dawki kynthup ia ka Jingkieng Umshyrpi bad ka Flyover ha Pomlum. Ia kane ka MSPB ka la pynsngew hadien ka jingleit jurip ia ka jingpyntrei ia ka surok Four Lane naduh Jingkieng Umshyrpi shaduh ka Flyover kaba don ha Pomlum ka ban pyniasoh shaduh Dawki.Ha kane ka jingleit jurip la ialam da u Chairman ka MSPB u Bah Metbah Lyngdoh ha ka jingdonlang kiwei ki dkhot kynthup u MLA Olan Sing Suin bad u Bah Matthew Beyongstar Kurbah, ki ophisar ka NHIDCL bad NHAI, ki ophisar ka tnat PWD, PHE ka Sorkar Jylla.Haba kren sha ki lad pathai khubor u Chairman ka MSPB u Bah Metbah Lyngdoh ula ong, ba watla ki kam ki iaid beit iaid ryntih ban pyndep ia ka surok Shillong-Dawki kynthup ka Jingkieng thymmai ha Umshyrpi bad ka Flyover kaba don ha Pomlum hynrei kumba iohi mynta, dang donkam shuh shuh ban pynsted khnang ban pyndep ia kane ka Project ha ka por ba la buh.

U Bah Metbah ula ong ba ha ka jingleit jurip la shem ba ka kynroh ba don shilliang ka Jingkieng Umshyrpi thymmai ker ia ka khyndew ka long ka bym i shngain bad ka Planning Board ka la bthah ia ka NHIDCL ban pynthikna ba ia ka kynroh dei ban tei thymmai.Ula iathuh ha ka jingleit jurip la shem bad ki don ki jyrwit jyrwat kiba pynslem ia ka project ban pyndep kynthup ka jingslem ka tnat PHE ka Sorkar Jylla ban weng ia ki pipe um kiba don ha ka jaka ba iaid ka surok.“Ki paidbah ki mad ka jingeh ban leit ban wan na 7 mer Upper Shillong sha Anjalee petrol pump naba ka shimpor haduh 1-2 kynta ia ki ban poi. Ngi sngew ka dei ka kam kaba sngewkhia ba ki paidbah ki hap pynlut bun ka por ban iaid ha kane ka surok khamtam eh ha ki por ba donkam kyrkieh” ula ong bad bynrap “Nga ruh nga iaid man ka sngi na kane ka surok sha Mairang bad nga la mad ia kajuh ka jingeh ban poi sha ka jaka ba nga thmu ban leit”.

“Ki contractor ki la kular ba kin sa pyndep noh ia ka bypass hapoh ka ar bnai bad yn sa pyllait noh ban iaid ki kali” la ong u Bah Metbah.U Chairman ka MSPB ula pynpaw ba ka rukom pyntrei ia ki katto katne ki kynroh kam long satia kaba ihun ne iskhem khamtam ka kynroh hajan ka jingkieng Umshyrpi. U iathuh ba ki Heh ka PWD ki la iakren ia kane ka kam bad ki contractor lem bad ka NHIDCL.Kane ka project ka dei ba la buh por ban pyndep ha u Nohprah 2025. Ka MSPB ka la bthah ia ka NHIDCL ba kan aiti ia ka por ba kan pyndep ia ka kam, haba banjur ia ka jingdonkam ban pyndep hapoh ka por bala buh ban lah weng noh ia ka jingeh ba man ka sngi jong ki nongleit nongwan.