Byrngem iakhih tyngeh ka FASTOM, lada ym kyntiew kyrdan Deficit ia ki nonghikai Adhoc

Ki nonghikai Adhoc hapoh ka shatri jong ka Federation of All School Teachers of Meghalaya (FASTOM) mynta ka sngi ki la mih paidbah ban iaid Rally bad ban shong kyllain mungor miet bad sngi ban dawa na ka sorkar ban kyntiew kyrdan ia ki nonghikai skul adhoc sha ki skul deficit. Ha kane ka sngi, ki nonghikai la pynlong ia ka jingiaid rally na madan Malki bad la pynkut ha kane kajuh ka jaka da ka jingshong kyllain morngor ba khlem buh por. Haba kren sha ki lad pathai khubor u Vice President ka FASTOM u bah Sanborn Jungai ula ong ba lada ka sorkar kam lah ban pynbeit kloi ia ki jingdawa jong ki ban rah noh ia ki nonghikai Adhoc sha ki Deficit System kaba kynthup naduh ka jingsiew, kin sa shim da ki sienjam ba kham tyngeh. U nongialam ka FASTOM ula ong ba lada ka sorkar ka don ia ka mon kam don jingeh ha ka liang ka pisa tyngka namar dang shen ka sorkar ka la tyrwa ban siew hi wat  ia ka tulop jong baroh ki nongtrei jong ki Autonomous District Council ha ka jylla.

“ Ngi tip ba naduh ki snem ba ladep, ka sorkar ka ju ai daw ba kam don pisa hynrei ngi tip shai ba lada ka sorkar ka don ia ka mon, ka pisa kam eh namar ban shna pisa bad ban shim rai ruh dei ma ka. Ula ai nuksa ruh ba ha kine ki snem, ka sorkar ka la pynmih bun ki prokram ha ka kyrteng jong u Myntri Rangbah bad ka la tyrwa ruh ban siew hi ia ka tulop jong ki nongtrei ka District Council,” ula ong. Katkum ka jingong u bah Jungai, ki don haduh phra hajar ngut ki nonghikai skul Adhoc ki ba la ai ka jingshakri sha ki 1 lak ngut tam ki khynnah skul kiba pule ha ki skul Adoc hynrei kaba sngewsih ka long ba ki nonghikai la kumba 30 ne 40 snem hynrei haduh mynta ki dang iai sah kumjuh. “ Ngi dawa ba ka sorkar kadei ban shna noh ia ki polisi kiban pynjah noh ia ka kyrteng Adhoc khnang ba ngin ioh da ka jingsiew kaban kiew kumba ioh lem kiwei ki para nonghikai,” ula bynrap.

U bah Jungai ula ong ruh ba lada iakren ha ka kyrdan pule bad ka rukom thung ia ki nonghikai, kam don ka jingiapher hynrei ka jingiapher ka long tang ha ka jingsiew ia ka tulop. Haba kylli halor ka kaiphod jong ka State Education Commission, ula ong ba kim shym la ioh ha kti ia ka kaiphod hynrei la shu pyntip da ki heh ka tnad ba kam shym la don ka jingai jingmut na ka Commission ban kyntiew tulop ia ki nonghikai skul adhoc.