Byrngem khang ka KSU ia ki ophis, skul lada pynbor ban rwai ‘Vande Mataram’

Ka Khasi Student Union (KSU) hynne ka sngi ka la bthah ia la ki dkhot ban sngap skhor bad ban khang ia ki Ophis lane ki program Sorkar, ki skul bad ia kino kino ki jait program lada ka don ka jingpynbor ban rwai ia ka jingrwai ‘Vande Mataram’.

Ia kane la pynbna da u General Secretary ka KSU u Samla Donald V Thabah ha ka jingialang rakhe ia ka jingdap 48 snem jong ka KSU ha Shillong.

Kane ka jingbthah ka KSU ka dei kum shi bynta ban pyrshah iaka jingbthah ka Sorkar India ba baroh ki dei ban rwai iaka jingrwai ‘Vande Mataram’ hashuwa ban pynlong ka kino kino ki jait program.

U Samla Donald ula ong ba haka jingrwai Vande Mataram ki don tang artylli ki dkhot (Paragraph) kiba kren shaphang ka ri India hynrei baroh ka jingrwai ka kren shaphang ka jinglong jingngeit Hindu.

“Kane ka jingthmu shaba lyndet jong ka Sorkar India ban pynkylla riewngeit Hindu ia baroh ki nong shong shnong ka Ri India, ban ban pynkylla ia baroh kum ki nong shong shnong rithor ba ngin hap bud noh iaka riti dustur jong ki nong rithor bad ngi hap klet noh iaka ka kong ka riti dustur” la ong u Samla Donald.

U samla Donald ula iathuh ruh ba haki snem 1950, kala don ka hukum bala pynmih daka Sorkar India ban pynlong iaka ktien Hindi kum ka ktien kaba kongsan (Compulsory).

“Ha kito ki snem ki nongialam ka jaidbynriew jong ki, kila ieng pyrshah iaka ktien Hindi bad kane ka jingieng pyrshah ki nongialam ka jaidbynriew, haduh mynta ka ktien ka thylliej bad ka riti dustur jong ka Jylla ka dang iai neh” ula ong.