Byrngem ki 5 shnong ban rah lama iong ha Secretariat ba leh meinah ka sorkar

Ki Synjuk ki Nongsynshar Shnong San Shnong Manad Area ha ryngkat ki paitbah na ki 5 tylli ki shnong ha ka thain Riwar Sepngi, kiba kynthup ia ka shnong Mawbidong, Pyndenlyngdoh, Pyndensohlang, Manad bad Lummawbah sa shisien pat ki la mih shakhmat ban dawa na ka sorkar jylla ba ka dei ban siang rong noh ia ka surok Photjaud-Mawbidong kaba jngai 6 km eiei, kaba la ktah haduh katta katta ia ki paitbah katei ka thain naduh ka ioh ka kot, bad shibun ruh ki longiing ki la mad ia ka jingsngewsih namar ka jingkhlad ki bahaiing hasem ba pang ba shitom tang ha shiteng lynti.

Ka Synjuk hapoh ka jingialam u Chairman, Bah Reddy Shylla ha ryngkat ki paitbah jong ki 5 shnong ka la maham tyngeh ba lada ka sorkar jylla lyngba ka tnat PWD (Roads) ka dang iai sngap mynthi halor kane mat kaba ki la ap mynta la bun bun snem, kim banse ban ‘boycott’ noh ia ka ilekshon MDC ka ban wan namar ba kam don jingmut na ka bynta jong ki, ha kaba kim ioh bynta na kata ka skhim paitbah, bad ka por kan poi ruh ha kaba ki lah wan ban shim da kiwei pat ki lad jingiakhih ba tyngeh da kaba leit tur sha Secretariat ha ryngkat bad ki lama iong.

U Bah Reddy u la ong ba ka jingsniew palat jong kane ka surok ka la wanrah shibun ki jingeh bad ktah ruh ia ka ioh ka kot jong ki paidbah na ka daw ba kim lah ban pynpoi ia ki mar rep sha ki ïew ki hat bad ha Mawkyrwat, khamtam ha ka por slap ha kaba bunsien ki kali ki sahkut noh tang shylynti. U Bah Reddy u la iathuh ruh ba ki don bun ki longiing longsem kiba la mad ia ki jingjia ba sngewsih na ka daw ka jingduh noh ia ki bahaiing hasem kiba don hapdeng ka pang ka shitom khamtam eh ki longkmie ba armet, kiba la khlad noh tang ha shiteng lynti shwa ban poi sha ki jaka sumar kum ha Mawkyrwat namar ka jingsniew palat ka surok.

Na ka liang jong u Bah Kenes Nonglait, President ka Federation of Khasi-Jaintia & Garo People (FKJGP) South West Khasi Hills District uba dei ruh na katei ka thain u la ong ba ka por ka la dei eh ia ka Sorkar Jylla ba kan phaikhmat lem sha kane ka thain, kaba la ap khmih lynti ia ka surok ba bha mynta la bun snem. U la kyntu ruh ia ka sorkar ba kam dei satia ban ap tad haduh ba ki paitbah kin pynlong jingiakhih, hynrei kadei ban pyni ia ka jingdon jingkitkhlieh na ka bynta ka iap ka im u paitbah.  Ha kawei pat ka liang, u Bah Kenes u la ai khublei ia u MLA ka thain, u Bah Renikton L. Tongkhar uba la rah ia kane ka mat haduh ha Iingdorbar Thawain ka Jylla, bad u la kyntu ruh ia une u nongialam ba un sngewbha ban iai buddien bad pynbor ia ka Sorkar ba kan pynurlong noh ia kane ka surok, kaba ki paitbah ka thain ki la angnud la slem slem bah.