Byrngem shah thngan ki Muster Roll bym pynkiew bainong ka sorkar

Ha ka general meeting jong ka seng kiba trei muster roll ba tip kum ka All Jaiñtia Muster Roll Workers & Labour Union, ba la pynlong hynne ka sngi ha hall ka dorbar shnong Tpep Pale Jowai, ki dkhot ba la wan shim bynta ki la iamir jingmut halor artylli ki mat, kaba nyngkong dei halor ka jingpynslem ka sorkar jylla ban pynkiew ia ka bai nongsngi (Variable Dearness Allowance) kaba la dei ban pyntreikam naduh ka 1 tarik Risaw, 2024. Kaba ar halor ka jingbym pynkiew ka sorkar ia ka bai nongsngi kaba dei hok ban pynkiew shisien 5 snem (Basic Floor Rates) naduh ka 1tarik Risaw 2023, katkum ka aiñ Minimum Wage Act 1958. Kiba ai jingkren ki la byniaw ia ka jingbym patiaw ka sorkar wat nalor ba ki dei ki nongtrei sorkar barit tam ka jingsiew, khamtam ha kine ki sngi bala nangrem dor ki mar bam, ka bai bordiñ, bai pule puthi ki khun ki kti bad kiwei.

U K.L.Pariat nongaibuit ka seng uba la donlang ha kane ka sngi, haba kren ula pynkynmaw iaka jingiaid lynti ka seng kumjuh ruh ki jingiakhih ba mynshwa naka bynta ban pynbor iaka sorkar ba kan pynioh iaka hok jong ki. Kumjuh ruh ula iathuh iaka jingiaid lynti ka seng naka bynta kine ki artylli ki mat bala iakren ha kane ka sngi. Hadien bala kut ka jingialang, ka General Secretary ka seng ka Wegetwell Rumut ka iathuh ba ka rai ba mih na kane ka jingialang ka long ba lashai ka 03/12/24 ka seng kan leit iakynduh lang bad u Vijay Kumar IAS, Commisioner & Secretary Finance ka sorkar Jylla bad lada kim ioh iaka jubab ba pynhun katkum ki mat jingdawa kila rai ban leit shong shah thngan khlem buh por ha Shillong haka 17 tarik mynta u bnai.

Ha kane ka sngi kiba trei Muster Roll haki tnat treikam bapher bapher ruh kila pynsngew la ka jong ka jingeh haki tnat treikam ba ki trei, khamtam kiba trei haka tnat sericulture ki ong ba ki shem jingeh bha namar ba iaki la siew tang arsien shisnem nalor kiwei pat ki jingeh.