Byrngem u Bah Adelbert ban mudui sha Iingbishar

U MLA ka North Shillong constituency u Bah Adelbert Nongrum ula pynpaw ba un iai bteng ban buddien ia ka jingkynnoh pyndonkam bakla ia ka jaka ha New Shillong Township, Mawdiangdiang kaba la ju tip kum ka IAS Colony. U Bah Adelbert ula maham ban ujor sha Iingbishar halor kane ka kam lada ki bor ba dei khmih kim leh eiei. Ula kynnoh ba ula ioh jingtip ba katto katne ngut ki heh ophisar ki la pyndonkam bakla ia ka jaka ha IAS Colony na ka bynta ka kam ioh nong shimet kaba pynkhein ia ki kyndon ai jaka.

“Ngan ym sngap jar halor kane ka mat” la ong u Bah Adelbert da kaba pynkynmaw ba u la rah ia kane ka mat ha Iingdorbar thawain ain hadien ba la ioh jingtip ba ka don ka jingpyndonkam bakla ia ka jaka ha IAS Colony. “Nga ngeit skhem ba ym don mano mano ha ka imlang sahlang kaba lah ban long halor ka ain, halor kane ka nongrim, ngan iai buddien ia kane ka kam bad ngam banse ban leit ujor sha Iingbishar” u la ong. U MLA ka North Shillong u la pyntip ba ula sdang ban pynkhreh ban ujor mukotduma ha ka ain. “Ngam lah ban pdiang ia kane ka jinglong jingman, nga don ha ka jingpynkhreh bad nga sngewthuh shai kumno ngan iaid shakhmat” u la ong.

U la pynkynmaw ba haba jubab ïa ka jingkylli jong u ha ka Iingdorbar thawaiñ, ka Sorkar ka la pynshai ba ka Society ka shah ban tei ki jaka sah na ka bynta ki Ophisar hynrei katkum ki kyndon ym shah ban ai wai ban tei iing basa kum ki Hostel bad kiwei. U Bah Adelbert u la kyntu ia ki bor ba dei peit ban shimkhia mardor ban weng ia kane ka jingeh bad ban pynthikna ban bud ryntih ia ki kyndon ba ia dei bad ka jingai bynta bad jingpyndonkam ia ki jaka Sorkar.