Da ka buit thymmai ai jinghikai ka KVK ia ki nongrep ha Jaintia

Halor ka thong ban kyntiew iaka rep ka riang jong ki paid nongrep katkum ka juk jingstad thymmai ka Krishi Vigan Kendra Jaiñtia Hills, kaba don ha Wahiajer, West Jaiñtia Hills District  kaba dei kawei naka tnat treikam sorkar ba peit iaka rep ka riang, hynne ka sngi ka 19/05/2025 kala plie ia ka prokram ai jinghikai ba kyrpang na ka bynta ki nongrep batip kum ka Viksit Krishi Sankalp Abhiyan ka ban neh 2 taiew lynter bad ka ban kut haduh ka 12/06/2025.  Kane ka Viksit Krishi Sankalp Abhiyan dei kaba la mang da ka sorkar India na ka bynta ban pynioh jinghikai sha ki 1.5 klur ngut ki  nongrep bad palat  2000 ngut ka kynhun ki scientist ban ai jinghikai sha ki 700 tylli ki District ha ka Ri. Lyngba kane ka prokram ki nongrep kin sa ioh jingbatai pynshai bniah halor ka rukom rep katkum ka buit jingstad thymmai bala lap daki scientist naka jingwad bniah jong ki, khnang ban lah kyntiew iaka rep ka riang bad ri jingri.

Haka jingialang plie ia kane ka  Viksit Krishi Sankalp Abhiyan ha phyllaw ka ophis KVK Jaiñtia Hills kaba don ha shnong Wahiajer, West Jaiñtia Hills bala donlang ruh ki nongrep, ka Joint Director of Horticulture ka kong B. Mylliemngap ka ong, ka jingsdang ia kane ka Viksit  Krishi Sankalp Abhiyan ka long kum ka jingkieng ban pyniasoh hapdeng ka buit rep stad saian bad ka jingrep lyngkha. Haba kren pynshai haba iadei bad ka rukom rep rukom riang hapoh ka Jylla Meghalaya kynthup naduh ki jingdonkam bad ki jingieh, ka ong, kaba kongsan eh ka jingdonkam haka rep ka riang dei ka mariang ka khyndew bad ka um kaba bha bad bakhuid. Hynrei haka juk ba mynta khambun hi ym ioh shuh ia kata, ka daw dei ka jingpom iaki dieng ki seij, ka jingpynmih ia kiei kiei kiba jakhlia lyngba ki tdem, ki kharkhana bad sa kylla ka jinglong ka suiñbneng.

Ka Director of Agriculture, Govt of Meghalaya ka kong JC. Lyngdoh haba kren kum ka kongsan ka ong, ban kyntiew iaka rep ka riang la pynkupbor iaki nongrep lyngba ka buit jingstad thymmai, bad ka jingthmu kane ka Viksit Krishi Sankalp Abhiyan ka long ban wanrah ki jingtip ba thymmai shaki nongrep. Ka iathuh  ba ka sorkar mynta kala wad lad ban pynsuk iaki nongrep, khnang ba nangne shakhmat kim donkam ban trei than eh daka bor met, namar la bun ki skhim sorkar ba ki paidbah ki lah ban ioh, la haka jingdei ki subsidy naka bynta ban thied iaki kor ki bor, ki lad jingiarap ban pynbha iaka khyndew ba rep ba riang, ki jinghikai lyngba ki tnat ka rep ka  riang jong ka sorkar. Ha kajuh ka por ka iathuh ruh ba don ka skhim ba lah ki nongrep ban ioh lada shah pynjulor ki mar rep jong ki. Ha kane ka sngi la donlang ruh u Principal Scientist ATARI Zone VII, u Waheh shnong ka Wahiajer u S.Laloo, ka Larika Challam Senior Scientist and Head KVK, Dr.A.K Singha bad kiwei.