Da ka ‘Operation Alert’ pyntreikam ki BSF ha khappud India-Bangladesh

Ki shipai iada khappud Border Security Force (BSF) Meghalaya ki la sdang ia ka “Operation Alert” ha shilynter jong ka khappud India-Bangladesh hapoh ka Jylla. Ïa kane ka ‘Operation Alert’ la sdang pyntreikam ha Meghalaya naduh ka 10 haduh ka 16 tarik mynta u bnai Nailar ban pyntikna ia ka jingshngain ha ka sngi rakhe ia ka Independence Day. Ia ka operation la pynlong ryngkat ka jingiatreilang bad ki Pulit ka Jylla bad kiwei ki bor pahara ka Sorkar Pdeng. Na ka liang ki shipai BSF kila dang pynbun shuh shuh ia ki bor shipai ha ki bynta ba kham sha khmat jong ka khappud bad ki heh ophisar ka BSF, FTR HQ bad na Sector HQ ki la leit sha khappud bad peit ia ka jingpyn treikam.

Kane ka jingpyntrei kam jong ki shipai BSF ka long ban pynkhlain ia ka pahara ia ki jaka, da kaba pynlong ka jingpahara baroh shi sngi bad ruh da kaba pynap ne buh ia ki jaka talasi (naka check) kumjuh ruh ha ki jaka wah ban khang lad ia ki briew ha khappud.Ha kane ka jingpyntrei kam ia ka operation alerts la pynleit jingmut ruh ban peit ha kaba ia dei bad ki kam khaii tuh ia ki masi ha khappud bad kumjuh ruh wat ia ki mar ki mata ba la shah bad ruh ka jingleit bad jingwan beain ha khappud. Ki jaka ba ki shipai BSF ki la pynleit jingmut bha mynta ki long ha kaba iadei bad ki lynti bad kumjuh ki bynta ba don ki wah ha shilynter jong ka khappud, mynta ki la don hapdeng ka jingpeitngor kaba jur bha.

Na ka liang jong u IG FTR HQ BSF Shillong u O P Upadhyay uba don mynta ha khappud ula ong, ka “Operation Alert” ka pyni ia ka jingshimkhia jong ki shipai BSF ban iada na ka bynta ka jingshngain jong ka ri ha kum kane ka por ba don ka jingleh kmen bad khang lad ba kan ym don kano kano ka jingshah pynthut. Kane ka jingtreikam kan dang neh tad haduh ka 16 tarik u Nailar, bad ka jingpahara ba khlaiñ ha kylleng ki jaka jong baroh ka Meghalaya kan iai bteng.