Da ki hajar tuid ki paidbah ban leh don burom khatduh ïa i heprit Insaphira

Da ki hajar ngut ki paidbah hynne ka sngi kila wan tuid ban ai burom khatduh ia i heprit Insaphira Lyngdoh Mawnai iba shah pyniap ha Nongrah Nonglum Shillong. Ia i heprit Insaphira Lyngdoh Mawnai (4 snem ka rta) khun jong ka Kong Labyntalin Lyngdoh Mawnai bad u Bah Gowell Lyngdoh Mawphlang la tep ha u Lum jingtep ka Balang u Blei Nongrah. Hashuwa ban leit ontep ia ka met jong i heprit, la pynlong shwa ia ka leh niam khatduh ha iingsah ha ka jingiadonlang da ki hajar ngut ki paidbah kiba na ka thaiñ Nongrah bad na jngai ruh.

Haba kren ha kane ka sngi na ka liang u kpa i heprit Insaphira Lyngdoh Mawnai u bah Gowell Lyngdoh Mawnai u la buh ka jingkyrpat ia baroh ki nongshong shnong ha Ri Khasi Jaintia ba kin ym buh shuh ia ka dur ine i heprit ha ki social media da kaba pynpaw ba kane kan ktah bad pynsngewsih ia ka ing ka sem kaba ngat ha kane ka lanot. Ki nongialam shnong ka shnong Nongrah ki la pynpaw ia ka jingsngewlem, sha kane ka longing ha ryngkat ruh ka jingkular ba Kum ka Shnong kan sa shim ki sienjam ban pynthikna ia ka suk ka saiñ ha kane ka shnong. Ha kine ki 2 sngi hi la iohi ia ka jingwan tuid ki nongshong shnong na kylleng ka Sor Shillong ki nongialam  shnong ha ryngkat ruh ki nongmihkhmat kiba la pynpaw ia ka jingsngew lem halor kane ka jingjia.

Lah ban kdew ba u heprit Insaphira i la jah na ka iing ha ka step 14 tarik Nailur bad haka step 15 tarik la lap pat ia ka metiap jong i na kawei ka iingbriew kaba dangshna thymmai kaba don marjan bad ka iingsah. Ha kane ka sngi leh donburom khatduh ïa i heprit, la sakhi ba ki nongwan tuid sngewlem sha ka iingsah i heprit, kila pynlong ruh daka jingiaid paidbah ban pynrem iaki riew thrang snam. Ïa kane ka jingiaid padibah la pynlong daka Synjuk Ki Rangbah Shnong Nongthymmai Pyllun, ha kaba ki paidbah kila sdang iaid na Rynjah Police Point ter ter shaduh sha ïingsah jong i heprit.