Da ki Mawsahnam tei ka Mawlynnong ia kiba noh

Ka Dorbar Shnong Mawlynnong ka la pynieng da ki mawsahnam ia kito ki briew ia kiba la noh synniang met bad mynsiem kiba la prat lynti ban pynkylla dur ia ka shnong Mawlynnong sha ka jaka jngohkai pyrthei. Ia kine ki maw sahnam ka Dorbar Shnong Mawlynnong la plie hynnin ka sngi Saitjain da u Symbud Myntri Rangbah ka jylla u Bah Prestone Tynsong kum u kongsan, ka myntri barim ka jylla ka Kong Ampareen Lyngdoh kum ka kongsan symbud bad iadonlang u Bah DD Laloo, ka Kong Patricia Mukhim, ki nongshong shnong, ka San Shnong Youth Organization Upper Shillong bad kiwei kiwei.

Ki mawsahnam kynthup ia ka kyrteng u Bah DD Laloo, u Myntri Sorkar barim ka jylla u (L) RG Lyndoh, u Bah Prestone Tynsong, ka Kur Kharrymba kaba la ai sngewbha ka jaka bad ka Tourism Forum Leaders ka Shnong kiba la maitphang bad prat lynti ban kyntiew ia ka shnong kum ka jaka jngohkai ba pawnam ha jylla bad ha ka ri baroh kawei. Ka jingthmu ban buh ia ki mawsahnam ka long ba ki pateng ban wan bad ki briew ba wan kai kin tip kumno la pynkylla dur ia ka shnong Mawlynnong sha kam jngohkai pyrthei.

Haba kren ha ka jingialang u Bah Prestone ula ai ka jingiaroh ia ki rangbah bad baroh ia kiba don bynta ba la trei borbah ban pynkylla ia ka dur ia ka Shnong Mawlynnong haduh ba kan ioh ia ka nam kum ka shnong ba khuid tam ha dewbah Asia. U la kyntu ia baroh ba ki dei ban iai bteng ban pynneh ia kane ka jingkhuid suba bad ruh ban kyntiew ia ka kam jngohkai ha kane ka thain.