Da ki phew hajar poi ki paidbah ha ka sngi kut ka Behdeinkhlam Jowai

Ka Lehniam Behdeinkhlam jong ki paid Jaintia kiba dang bat ia la ka niam tynrai ka la kut noh hynne ka sngi ha ka jingiphuh iphieng ia kaba la wan ban iashim bynta bad sakhi ruh da ki hajar ngut ki paidbah na kylleng ki jaka. Ha kane ka sngi pynkut ia ka Behdeinkhlam kaba la long ha Aitnar Jowai, la wan ban sakhi da u Symbud Myntri Rangbah ka jylla u Bah Sniawbhalang Dhar, u MP ka Rajya Sabha u Bah WR Kharlukhi, ka Myntri ka koit ka khiah ka Kong Ampareen Lyngdoh, u Myntri ka tnad Revenue & Disaster Management u Bah Kyrmen Shylla, u MLA ka Jowai u Bah Wailadmiki Shylla, u MLA ka South Shillong u Bah Sanbor Shullai, ki heh ki hain ki paidbah bad ki nongjngohkai kiba la na kylleng ki jaka.Ia ka Behdienkhlam la rakhe shisien shisnem ha u Naitung ban nguh ban dem ha u Trai nongbuh nongthaw ba un theh ia ki jingkyrkhu ban ioh ia ka koit ka khaih bad bha ka rep ka riang bad ban beh ia ka khlam da ki siej bad da ka jinglehniam lehrukom. La ngeit ruh ba ka Behdeinkhlam kam dei tang ka jingbeh ia ka jingpang jingshitom hynrei kadei ruh ka jingbeh ia ka sniew ka smeh kaba ktah ia ka imlang sahlang.

Ka mat kaba kongsan jong kane ka lehniam lehrukom kadei ka jingpynkhreh ia ka “Dein Khlam” bad ka “Khnong”, kaba ka ot pyllun bad kaba beit lynter bad kaba la pynjlih bha ia kaba la wanrah pat sha Jowai da ka jinglehkmen bad jingleh sngewbha. Ha shwa kane, ia u ‘Symbud Khnong’ da ka dieng kaba jrong, la wanrah sha ka jaka shad ha kaba, da ki hajar ngut ki paidbah ki ialeh ban ioh ktah ia katei ka dieng kaba ka pynkhreh kyrpang ia kaba ki ngeit ba kiba ioh ktah ia ka Khnong, kan iada ia ki ban lait na kino kino kino ki jingpang bad ban wanrah ia ka bha ka miat ha ka kam kaba ki trei bad ha ka khaii pateng. Ki samla na ki shnong ki thaw bapher bapher kila shna pynitynnad ia ki tabut ne ki Rot kiba jrong 10 haduh 40 phut kiba la shna ha ki dur ki bapher bapher ha kaba la pyniaid pyllun ha katei ka jaka shad bad kine ki Tabut ki don ruh ia ki khubor kiba kit ia ki jingmut bapher bapher. Kine ki tabut ki don ruh ia ki khubor kiba khlain ban pynneh pynsah bad ban iada ia ka mei mariang bad ia ka pyrthei nalor ka jingiakhun pyrshah ia ki kam sniew kiba ktah ia ka imlang sahlang bad kawei kaba la khring bha ia baroh kadei ka tabut kaba la shna pynwandur halor ka Operation Sindoor bad ka jingdonkam ban pynkut noh ia ka jingngop ka Pakistan ha ki kam lehnoh.

Ha ka por janmiet pat la pynlong ia ka ‘datlawakor’ ne ka jingialehkai kynjat ia ka bol kaba la shna da ka dieng kaba la iakhun hapdeng ar tylli ki kynhun kaba na ka shajrong bad kaba na sha them jong ka Wah Myntdu bad ka ngeit kano kano ka liang kaba jop ka.mit kan bha ha ka rep ka riang mynta u snem. Haba kren ha ka jingialang u Bah Sniawbhalang Dhar, ula pynpaw ia ka jingsngewsarong ia kane ka lehniam lehrukom kaba la lah ban lumlang ia baroh ki briew ha kawei ka jaka bad ula banjur ia ka jingkongsan jong ka jingiatylli ban pynlong ia kane ka jingialehkmen kaba jop bad kala nang khlain katba dang mih ki snem ha kaba la pynlong ruh iaka ha kylleng ki jaka.U Bah Sniawbhalang ula pynpaw ka jingsngewnguh ia u Myntri Rangbah ka jylla uba la ai ka jingkyrshan ha ka ban pynbha ia katei ka pung ba kyntang ban pynlong ia ka shad, kaba dei ka bynta kaba kongsan jong ka jinglehkmen lehsngewbha.