Da kynduh para Khasi ne Garo ha Delhi ki her iap, ka KSU Delhi ka la pyllait im bun ki mynsiem na kti ki riew bymman

U Symbud Myntri Rangbah ka Jylla u Bah Prestone Tynsong ula ong, ym duna ia ka 15 sien ba ka Khasi Students Union (KSU) Delhi Unit ka la ioh ban pyllait ia ki mynsiem ba lui lui na ki kti jong ki bymman hapoh ka nongbah Delhi. “Ym duna ia ka 15 sien ba ka KSU ka la ioh ban pyllait bad iarap ia ki mynsiem kiba lui lui, kiba wan na jngai ban wad kam hynrei kaba sngewsih ka long ba ki la poi pynban ha ki jaka ki bym dei bad bun ngut ki mynsiem briew ki la ioh ia ka jingiada na ka KSU Delhi Unit” la ong u Bah Prestone haba kren kum u kongsan ha ka jingiakob Mr & Ms Hynniewtrep ba la pynlong da ka KSU Delhi Unit ha Meghalaya House, Dr APJ Abdul Kalam Road, Delhi.

U la ong, ka sorkar Meghalaya ka ai khublei kyrpang ia ki nongialam bad ia baroh ki dkhot ka KSU Delhi Unit bad ula kyntu ia ki ba kim dei ban artatien ban iakren ne phone ia u Myntri Rangbah ka jylla ne ia u Symbud Myntri Rangbah, namar ki don ym tang ban shakri ia ki nongshong shnong ha Meghalaya hynrei wat shabar jong ka jylla ruh. U Bah Prestone ula ong, ba ka jingwan ban iadonlang ki paidbah ka jylla kiba sah ha Delhi sha kane ka jingialang ka long ka jingai mynsiem ia ka KSU Delhi Unit bad u ngeit skhem ba kane ka Unit kan dang iai bteng ban trei kham bha bad ka seng KSU hapoh ka jingialam u Bah Lambokstarwelll Marngar kan dang lah ban pyniar ia ki thapniang ki jong ka ha kiwei kiwei ki jylla jong ka Ri.

“Ka long kaba sngewsih ban iohi, teng teng haba iakynduh para Khasi ne para Garo, i kumba ki tieng ban iakren iwei ia iwei pat bad ki her iap ba ki sheptieng ioh ki hap ban ai jingiarap. Ngi dei ban pynkylla noh ia kane ka rukom pyrkhat la ka dei ba ngin iap ngin ia iap lang bad lada ngi im kan long ka burom ia ka jaidbynriew” la ong u Bah Prestone. Nalor kane ula iathuh ruh ba ka sorkar jylla kan sa shna pynbha noh ia ka Meghalaya House khnang ba yn lah ban ioh ia ka jaka kaba biang ban pynlong ia ki jingialang.