Dang ap jingmynjur ka Sorkar ban pyndep ia ka Leshka Hydro stage-II

Ka Sorkar Jylla ka dang ap ban ioh sa kawei ka jingmynjur (Clearance) ban sdang pyntrei noh iaka Leshka Hydro Power Project stage-II. Lada ioh jingmynjur (Clearance) ka Leshka Hydro Power Project stage-II kaba pynmih bording 210 MW kan dei ka Project Bording kaba heh ha Meghalaya. Haduh mynta watla ka Leshka Hydro Power Project stage I, kala treikam shaid shaid hynrei ka Sorkar ka dang ap iaka jingmynjur (Clearance) jong ka Environment ban ioh pyntreikam sa iaka Stage II.

Ban ioh jingbit ban pyntreikam sa iaka Leshka Hydro Power Project stage-II, ka tnat Bording ka donkam ban ioh 12 jingmynjur (Clearance), ha kaba 11 tylli, ka tnat kala dep ioh. Haba pyntip ia kane u Myntri Tnat Bording u AT Mondal u la ong ba ka project kala dep ioh ia 11 na ki 12 tylli ki jingbit ba kynthup ia ka Environment bad Forest Clearance, kiba donkam ban lah pyntrei ia ka. U Myntri u pyntip ba ka bynta kaba sah ka dei kaba kham kongsan bad ka eh bha, hynrei u kyrmen skhem ba yn sa lah ban ioh ia ka haba kut jong une u snem. “Ngi dang sah ban lait sa kawei ka bynta. Kane ka dei kaba kham tasam bad ba jyrwit jyrwat bha” ong u Mondal.

“Shisien ba ngi la ioh lut ia baroh ki jingbit, ka project kan sa lah ban iaid shakhmat, da ka jingmang tyngka ba kot kumba T.2100 klur, ka ban long ruh ka project pynmih bording kaba heh duh ha ka Jylla” ula bynrap. Haba kylli, u Myntri ula pyntip ba ka jinglong acid jong ka wah Myntdu kala kham duna, kaba long ka daw ba lah ban pyntreikam ia ka project.