Dap 100 ka Shangpung UP skul, ia ki Enjiniar, Doktor ha ka jingiaid lynti 100 snem

Ka Shangpung Govt Upper Primary School ha ka sngi Saitjaiñ 16 tarik ka la lehkmen ia ka jingdap 100 snem ka jingiaid lynti ka skul ban ai jingshakri lyngba ka jingnang jingstad, ryngkat ka jingdonlang ki khynnah skul barim kiba la long heh long haiñ mynta ha ki kyrdan bapher bapher, ki kmie ki kpa jong ki khynnah skul bad kiwei, katba u Commingone Ymbon myntri ka tnat Water Resources, Food & Civil Supplies etc ula long kum u kongsan. U Symbud kongsan u Er.D. Langstang uba pule ha kane ka skul uba la bat ruh mynta ia ka kyrdan Chief Engineer PWD (Road) ha ka sorkar Jylla, u iathuh ba la don bun kiba juh pule ha kane ka skul mynta ki la bat ia ki kyrdan baheh kynthup naduh ki Doctor, Engineer, ha ka kam nonghikai, nangta kiba long jop ha ka jingiaid lynti jong ki kum ki briew nongkhaii (business) bad kiwei.”Ha kum kane ka sngi ymdei tang ban  lehkmen ia u mawmer dap 100 snem tangba dei ban iaroh ruh iaki kam ba bha jong kiba don bynta ban pyniaid beit ia kane ka skul ba kynthup naduh kiba hikai, ki khynnah skul barim, ki kmie ki kpa, ki staff kane ka skul, da kaba khmih lynti ruh lyngba ka jingkyrshan lang da baroh kane ka skul kan nangkiew nangkiew”. Ong u Er.D.Langstang.

Na ka liang u kongsan Commingone Ymbon haba kren u ong, kane ka jinglehkmen dei tang kum ka jingpyni  rong, hynrei kaba  donkam tam dei ki khynnah skul bad ki nonghikai ban shimkhia naka bynta ban tynrong iaka skul ba kan poi biang shakhmat, namar haka juk jingiakop dei tang ka jingtrei shitom ba lah ban poi shakhmat bad jop haki kam bapher bapher, nalor ban kynmaw ruh ba ymtang ka kam sorkar ba lah ban pynim. Haba u phai shaka pule puthi haka Jylla u ong, ka Jylla Meghalaya dei kaba bun skul tam haka thaiñ Northeast, hynrei sngewsih pat ba ka pule puthi kala nanghiar, ka daw dei ba bakla naba sdang, bad naka jinghiar ka pule puthi la hiar ruh ka akor burom ki khynnah skul. Ha ka jingiadei bad kane u ong, naka liang ka sorkar ba mynta ka la ialeh dohiap bha ban wad ki lad ki lynti ban pynkiew iaki skul ha ki rukom bapher bapher. Nangta ula pynkynmaw ruh da kaba ong, lada kum ki nongshong shnong ki iapait iapra  hapoh shnong poh thaw ki lah ban duh  ia ka jingthrang jingangnud.

Ha kajuh ka por ula kitbok kitrwiang ruh ia kane ka skul ba lyngba ka jingdap 100 snem  kan nanglah shuh shuh ban ai  jingshakri ba bha tam iaka thaiñ. Ha kane ka sngi la donlang ruh u Paul Reader Marweiñ Chairman Meghalaya Public Service Commission,  ka A P.Syiem  DSEO West Jaiñtia Hills District bad kiwei. Ka jinglehkmen ha kane ka sngi ka la long  kaba phuh ba phieng da kaba ot ruh ia u  cake dap 100 snem, ka jingpynher 100 tylli ki baloon, ka jingshad jingrwai na ki khynnah skul barim, kiba mynta bad naka Shlem ki Sur Tynre Shangpung.