Dap smam ki paidbah ha Ïew Nongstoiñ ban sngap pyninia ki kyrtong MDC

Ki 6 ngut ki kyrtong MDC na ki seng saiñ pyrthei bapher bapher ha Nongstoin konstitwensi kynthup u kyrtong shimet ki la kiew ha rynsan pyninia ha ïew Nongstoiñ kaba la pyniaid da ka shnong New-Nongstoin. Da ki hajar ngut ki paidbah ki la tuid bad dap smam ia ka Ïew Nongstoiñ ban sngap ia ki nia ki jutang ki kyrtong ki kren ha ka jingialang. Ki 6 tylli ki kynhun seng saiñ pyrthei ba la iashim bynta ha katei ka sngi ki kynthup ia ka BJP ba la mihkhmat da u kyrtong Bah Demendar Lyngdoh Nonglait, bud sa ka party VPP ba la kren da u kyrtong u Dr. Juristman Iawphniaw bad Bah Brightstar Marbaniang MLA ka Mawlai. Ka party HSPDP ka la shim ia ka bynta ba lai bad ki nongkren ki kynthup ia u Bah Methodius Dkhar MLA ka Mawshynrut bad ka kong Badariti Lyngdoh Nonglait kaba dei ka kyrtong MDC. Ka NPP ka la shim ia ka bynta basaw ha kaba ki nongkren ha katei ka sngi ki kynthup ia u Bah Sanjied Kynsai Shangrit, Bah Macmillan Byrsat MLA barim, Bah Gabriel Wahlang MLA ka Nongstoin bad bah Dressar Marngar uba dei u kyrtong NPP ka Nongstoin. Na ka liang ka Congress ki nongkren ki kynthup ia u Bah Bormanding Nonglang, President ka WKHDCC bad Bah G.Ningstar Marthong uba long u kyrtong bad kiwei kiwei. Ia ka bynta ba khatduh la shim da u kyrtong khlem seng u Bah Micheal Thongni ha kaba la iarap ban ai jingkren lang da u Bah Tarsis Mawlot uba long uwei na ki nongkyrshan jong utei u kyrtong.

U Bah Demendar Lyngdoh, kyrtong ka BJP haba kren ula ong, ba lada phi pynjop ia nga, nga kular ba 3 sngi ngan shong ha ophis District Council Nongstoin bad ar sngi ha Shillong khang ba ki paidbah kin suk ban iakynduh. U la kular ruh ban pynbha ia ka Ïew Nongstoiñ, ki shnong ki thaw bad ki lynti synkien ban suk ki paidbah. U Dr. Juristman Iawphniaw kyrtong ka VPP ula ong, ba u don ia ka mynsiem ban shakri hok ia ki paidbah jong ka Nongstoin Constituency khnang ba ki paidbah kin iohi ia ki jingshisha bad ki jingkynriang kiba don hapoh District Council. Ula ong ruh ba kum u samla u don ia ka jingthrang ban wanrah ia ka jingkylla ha ka Ri bad ka Jaitbtnriew baroh kawei. Ka kong Badariti Lyngdoh Nonglait ka la ong ba lada ka shu kwah ban jop suk, ka la ialeh beit na Mawshynrut Constituency namar ha ka election ba ladep ka la ieng na kane ka Constituency bad hangne ka party ka la don mynta ia u MLA, kumta ka jingkyrmen ka don bha ia ka, hynrei haba pyrkhat ia ka 25 tarik u bnai September 2015, ha ka por ba u Maieit Hopingstone Lyngdoh (Bam Kwai ha Dwar u Blei) u don hapdeng ka jingthiah pang ka la pan na u, ba un ai bor ba kan trei na ka bynta ka party bad ka Ri ka Jaitbtnriew, hynrei um ioh sngewshuh bad ka shim ba kane ka lad ba kan ioh ïakhun na Nongstoin Constituency ka dei ka jingsngap jong u ia ka jingpan jong ka bad ka la pynsngew hakhmat ki paidbah ba kim dei ban sngew khun swet namar watla kam kot rynieng kat u Maieit hynrei ka don ia ka jingangnud ban bud ia ki dienjat jong une u riewkhraw.

U bah Dresser Marngar haba shim ia ka bynta ban ai jingkren kum u kyrtong ka NPP ula ong, ba ka Khasi Hills Autonomous District Council ka dei ka shlem saindur jong ka jaitbynriew bad ka stieh ba skhem ban iada ia ka. Kumta u la kyntu ruh ia ki paidbah ba kin puson bha ia kane ka mat da kaba u la ong ruh ba ka MDC election ka dei kaba kyntang ha kaba sawdong ka lyngwiar dpei ba ki shikhun shikmie shipyrsa shi jait ngi ia shong ban ia sneng ia kraw ban long kiba tip briew tip blei bad ban don ka akor ka burom bad kata ka MDC election ka dei kaba sdang naduh rympei. Ula ong tang ka jingstad jong ngi ka wanrah ia ka jingsngew sarong hynrei ngi dei ban don ia ka bor shemphang ban pyni bad kdew ia ka lynti shano phin iaid. Katba na ka liang u kyrtong ka Seng Congress u bah GNS Myrthong ula ong, ba u don ka jingangnud ban iai pynskhem ia ka 6th schedule ym ban ia kylliang ne ia bujli noh da kiwei pat ki Article, namar nga sngewthuh biang biang ba kane ka 6th schedule ka long kaba donkam haduh katta katta ia ka jaitbynriew hynrei kane ka 6th schedule katba nangmih ki sngi kala sdang ban duh bor noh namar ba ki nongialam kiba ngi jied kim don ia ka jingkitkhlieh ban leit pynskhem ia ka bad ka Party Congress ka don ia ka jingangnud ban iai pynskhem ia ka bad nga ruh kum u kyrtong lada phi ki paidbah phi ailad, nga ruh ngan iai pynskhem ia ka 6th schedule bad ngan iai don ha syndah bad u paidbah. U bah Micheal Thongni kyrtong shimet haba shim ia ka pali ba khatduh ban ai jingkren ha katei ka rynsan u la ong ba lada u shah jied kum u MDC un don ryngkat bad u paidbah khamtam u rit u ria ban sngap bad sngew ia ka jingeh ka jong ki bad u la ong ba u la don ha ka kam shakri paidbah la 14 snem kynthih da kaba u la pyniasyriem ruh ia lade kum u misteri u ba la tbit ban shna ia ka iing ka sem,  ha kaba ki trai kiba phah shna iing ha u, kim donkam shuh ka jingsngew khohñioh ba ioh lehse um tip ban shna ia ka iing hynrei lada phi ai ia nga ka lad, ngan tei ha ka rukom kaba skhem bad lada nga jop ia kane ka election, ngan pyntreikam hok bad trei khuid ia ki kam baroh bad nga angnud ba ki skhim paidbah dei ban pyntreikam hok ym ban long laitlan kumba ka long ha ki por ba la dep.