Dawa ban buh ‘Signboard’ Bun kim tip ka iew Nongdie madan ha Parkinglot MUDA

Ki nongshong dukan ha Parkinglot MUDA, Police Bazar, Shillong ki pynpaw ba ka die ka thied ka hiar bha haba nujor bad ki por ba shong die madan harud surok ha Police Bazar. Haba iakren bad u nongthoh khubor ka kong Iadahun Warjri ba sah ha Laimer Umlyngka, Shillong kaba die muja parkinglot MUDA ka la ong, ba ka iew ka hiar bha lada nujor bad ka por ba shong die madan ha surok, Polie Bazar. “Ka jinglah die mynshwa ka lah ban long ki nongleit nongwan ban iaid kai haba ki itynnad ki thied ia ki mar wat lada shu pynieng tang ka byrni namar ym ioh ban phriang kumba long mynta, namar ki nongtied kim donkam ban rung ha ki dukan, hynrei kumba long mynta ki nongtied ki hap ban wan khnang ban thied jingthied” la ong ka kong Iadahun.

“Nga la shong die madan palat 5 snem hakhmat jong ka Glory Plaza bad shisngi nga dang kamai T.2500 lada bha ka iew wat lada ym ioh ban phriang ia ki mar, hynrei mynta wat shihajar ruh shitom ban ioh kamai shisngi” ka la bynrap. Halor ka jingkylli ka la pynpaw ia ka jingkmen ba ka sorkar ka la ai jaka ia ki ban shong dukan ha Parkinglot MUDA ban lait na ka sngi u slap bad ka ai khublei ia ka jingleh bha ka sorkar Jylla, hynrei kan long ka jingeh lada ka sorkar  ha ki snem ban wan ka dawa ban siew bai shong dukan nalor ba ym ym biang ka iew ka hat. Ka Kong Iadahun Warjri ka la kyntu ia ka sorkar ban buh ‘Signboard’ ba heh hakhmat ban rung ha Parkinglot MUDA, namar bun ki nongkyndong haduh mynta kim tip katei ka iew ki nongdie madan ba la kynriah ha Parkinglot MUDA, kumta ki duna ki nongkyndong ban wan thied ban pet bad ka shu i hui por janmiet ba bun ki nongwan shangkai hynrei ym don ba thied ia ki mar ki mata.

Ha kajuh ka por ka Pori Shwari Boro kaba dei na Assam hynrei ka la shong ha shnong Mawpat la palat 40 snem bad ka die ia ki soh ka pynpaw ba mynshwa ha surok ka dang ioh kamai saw san hajar shisngi, hynrei naduh ba la kynriah ha Parkinglot MUDA ka iew ka hiar bha bad bun ki soh ki shu sep ei bad pyiut bad kane ka ktah shibun ia ka kamai kajih ban pynbiang ia ki jingdonkam ha iing hasem. Kiba bun ki nongkhaii ki pynpaw ia kajuh ka sur ia ka jinghiar ka die ka thied haba nujor bad mynshwa ba ki dang shong die madan ha surok.