Dawa ban jurip ka kynhun ‘High Level’ ba kylla rong ka Wah Umngot

U Dr Ricky AJ Syngkon MP na Shillong Parliamentary Constituency ula phah jingthoh sha ki Myntri ka Sorkar Pdeng kynthup ia u Nitin Gadkari ba khmih ia ka Ministry of Road Transport & Highways bad ia u Bhupender Yadav myntri ka Ministry of Environment, Forest and Climate Change bad kyntu ba kin tuklar ia ka jingshah ktah ka Wah Umngot na ka jingshna ia ka surok Shillong-Tamabil. Ula pynpaw ka wah Umngot la tip kum ka wah ba khuid tam ha dewbah Asia hynrei kane ka wah ka la shah ktah na ka jingshna ia ka surok lyngba ka projek ba la bei pisa da ka Japan International Cooperation Agency (JICA) ia kaba pyntrei da ka National Highways and Infrastructure Development Corporation Limited (NHIDCL), kaba la wanrah ka jingkylla rong ia ka wah namar ka jingtuid khyndew bad ki maw na ka jingshna surok sha ka wah bad kane ka la ktah jur ia ka jingkhuid ka wah bad ka mariang.

Ula ong ka wah Umngot ka la kylla rong ktieh bad ka long ka jingma ia ki trai shnong, kiba pyniaid ia ki kam jngohkai pyrthei ki dohum bad kumjuh ia ka mariang. Halor kane ka mat ula kyntu ia ki myntri sorkar pdeng ban shimkhia ban leh eiei ban pynsangeh ia ka jingot bad pynkhyllem ia ki lum bad ka jingpyntuid ia ka khyndew sha katei ka wah wah bad ia ki wahduid ba marjan bad kyntu ban pynlong ia ka jingjurip ne Joint Inspection da ka kynhun ‘High Level’ ba kynthup ia ki ophisar ka Ministry of Road Transport and Highways, Ministry of Environment, Forest and Climate Change bad kiwei ki tnad ba don bynta lang.U MP ula kyntu ia ka sorkar ban phah ruh ia ka NHIDCL ban siew ia ka bai lutksan halor ka jingpynjulor ia ka mariang kumba la leh da ka National Green Tribunal ha Uttarakhand, bad ban pynkhreh ia ka River Restoration and Rehabilitation Plan ia ki sawdong sawkun ka wah Umngot bad kyntu ia ki ophisar ba donkti ban shim ka jingkitkhileh ban bud ryntih ia ki kyndon iada ia ka mariang.

U la pynpaw ka Wah Umngot ka kyrshan ia ki spah tylli ki longiing ban kamai jakpoh na ka kam jngohkai pyrthei kynthup kiba kamai da ki lieng, ki iing basa bad ki nongdie ia ki tiar tynrai, kaba la khring ia ki hajar ngut ki nongwankai ka jingshong ia ki lieng man la u snem namar jingkhuid khlir khlir ka wah. Hynrei na ka jinglong jingman mynta ka pynlong ia ki nongwan shangkai ban ym leit ha katei ka jaka bad ka wanrah ka jingduhnong ia ki nongshong shnong bad ka jylla baroh kawei.