Dawa ka JNC ban pyllait mardor ia ki nongialam ka MCTODA

Ka Jaiñtia National Council (JNC) ka dawa ban pyllait mardor ia ki nongialam ka MCTODA ba shah kem bad ka pynrem ruh ia uwei u Bar Jylla uba la byrngem ban phah kem ia ki dkhot jong ka MCTODA kiba pynlong ia ka jingiakhih. Katkum ka kyrwoh na u President ka JNC ubah Sambormi Lyngdoh ula pynpaw ka jingsngewkhia halor ka jingiakhih ka MCTODA bad ka seng ka la leit jngoh ia ki dkhot ka MCTODA ha Mawryngkneng bad ha ka jingkynduh bad ki la ioh ban tih bniah ia ka daw tynrai bad ki la shem ba ka jingong jong ka sorkar ka la ai bai kit ia ki trok mar na ki karkhana cement katkum ka dor ba la buh ka sorkar ka long ia ki katto katne, hynrei ym ia baroh. Ula ong, ba lada jin ba kine ki karkhana cement ki ai ne pyntreikam ia kata ka dor kaba lah buh ka sorkar ban treikam salonsar ia baroh ka MCTODA ruh kam pynlong shuh ia ka jingiakhih.

Ka seng ka la shem ruh ba ka dawbah, ka dei ba ka district council ba long ka nongiada ia ka khaii pateng u trai muluk hynrei ka la pynskhem ia ka jingtrei jong u bar jylla bad ki kompani ki la ioh laitlan ban thied ia ki kali kaba la ktah ia ki trai kali trai muluk bad tang ka Star Cement ka don haduh 300 ne 400 tylli ki trok bad Topcem ka Amrit bad kiwei. “Ngi kyntu ia ka district council ba kan pyntrei hok ia ka kyndon Trade by Non Tribal khamtam ha ka jingiadei bad ka jingthied kali kine ki company bad kumjuh ruh ia ka sorkar jylla ban buh da u pud ia ka jingthied kali ki company khnang ba kan ym ktah ia ki trai muluk ba don kali bad kiba im kamai jakpoh. U President ka JNC ula ong, lada ka sorkar ka kwah ia ka bha bad ia ka suk ka sain ka dei ban pyllait mordor ia ki nongialam ka MCTODA bad khot iakren ia ki.

Ka JNC ka kyntu ruh ia ka JAC jong ki ar tylli ki seng na Jaiñtia Hills bad na East Jaiñtia Trucks Association bad ka MCTODA ban long ia tylli kum ki khun ka bri u Hynñiewtrep khnang ba kan ym don ka jingiapher jingmut bad kine ki bar jylla ruh kin nym ioh ban iuhroit ia ki trai jylla bad dei ruh ban kynmaw ba kane ka dei ka buit jong ki bar jylla ban pyniashrut ban pyniapher jingmut khnang ba ka jingiakhih kan pulom. U President ka JNC ula iathuh ha jingialang ka CEC ka la iakren bad ka la pynrem jur ia ki jingbyrngem jong uwei u bar jylla uba dei u heh ka company uba la byrngem ia ki nongialam ka MCTODA.