Dawa ka JNC ban tohkit ia ka jingthmu ban buh Cement Plant ha Daistong

Ki nongialam ka Jaintia National Council (JNC) hynne ka sngi, ki la dawa na u Deputy Commissioner ka East Jaintia Hills ban tohkit mardor halor ka rukom ia die iathied ia ka jaka bad ban bthah ia ka MSPCB bad State Environment Impact Assessment Authority (SEIAA) ban pynsangeh shwa ia ka Public Hearing. Hynne ka sngi, ka Jaiñtia National Council (JNC) hapoh ka jingialam u Bah Sambormi Lyngdoh u President JNC ryngkat bad ki nongialam ki la leit ban ujor ha u Deputy Commissioner ka East Jaiñtia Hills u Shivansh Awasthi pyrshah ia ka Shree Cement Limited’s kaba thmu ban buh ia ka Integrated Cement Plant ha ka shnong Daistong. Ha kane ka jingujor ka la pynpaw ba ka don ka jingleh be-ain ha ka rukom ia die iathied ia ka jaka da u bym dei u riewlum ka jylla u Bharat Sharma na u Bah Syrpailang Sukhlain, katkum ka jingpyni jong ka Company ha ka kaiphod Environmental Impact Assessment kaba la aiti sha ka Meghalaya State Pollution Control Board (MSPCB). Kane ka jingthied jaka ka dei ka jingpynkhein ia ka Meghalaya Transfer of Land Regulation Act, 1971, kaba mana pyrshah ban iadie iathied ia ka jaka khlem da ioh jingbit shwa na ki bor kiba dei khmih bad na ka Jaintia Hills Autonomous District Council (JHADC).

“Ngi dawa ba dei ban pynlong ia ka jingtohkit ba mardor halor ka jingiadie iathied jaka, ka jingpynshisha ia ki kot ki sla bad ban bthah ia ka MSPCB bad State Environment Impact Assessment Authority (SEIAA) ban pynsangeh shwa ia ka public hearing. Ha ka dorkhas la kdew ruh ba kane ka buh ha ka jingma ha kaba ia dei bad ka rukom thied ia ki ajka na ki trai jylla” la pynpaw u Bah Sambormi Lyngdoh. Ka JNC ka la kynnoh ruh ba ka EIA kam don satia ia ki kot ki sla kynthup ka jingmynjur ka ADC, ki kot ki sla jong ka jingpynkylla, ne kano kano ka jingbit hapoh jong ka 1971 Act, kaba pyni ba katei ka rukom ia die iathied ka dei ka bym shong aiñ. “Ka la pynkheiñ shuh shuh ia ka Meghalaya State Investment Promotion Facilitation Act (MIIPA) 2024, ia kaba kam lah ban iaid palat ban ia ka 1971 Act, bad ia ka EIA Notification, 2006 bad dawa ba ka MSPCB ka dei ban pynsangeh noh mardor ia ka public hearing ha u Nohprah 2025 tad haduh ban da dep shwa ban pynshisha” la ong ka JNC bad ka pynpaw ba kam lah ban shaniah ia ki jingkular ai kam jong ka Shree Cement Limited da kaba kdew ia ka jingduna ha ka jingdon ki briew ba tbit ban treikam bad ka jingbym don ki buit treikam na ka bynta ban ai jinghikai.

Ka JNC ka la byrngem ruh ban pynlong da ka jingiakhih ba tyngeh, lada ka projek ka iaid shakhmat khlem da pynbeit ia kine ki jingeh bad ka sorkar ka dei ban bahkhlieh na ka bynta kano kano ka jingkhihwin ba mih na ka jingbym iahap ha ka rukom treikam. Ka JNC ka la pyntip ruh ba na ka liang jong u Deputy Commissioner ula pynthikna ia ki nongialam ka seng ba un shimkhia ia kane ka kam ban rah bad pynsngew sha ki bor ba halor bad ban sa ai da ka jingthoh sha ka seng ha kine ki khyndiat sngi ki ban wan.