Dawa ka JSU ban pyntreikam mardor ia ka MPSC ha Jowai

Ka Jaintia Students’ Union (JSU) hynne ka sngi kala dawa ia ka Sorkar Jylla ban sdang pyntreikam pura noh iaka Meghalaya Public Services Commission (MPSC) Examination Centre ha Ri-lum Jaintia. Haba iadei bad kane ka JSU ka la aiti ruh da ka Dorkhas sha u Symbud Myntri Rangbah ka Jyla u Bah Sniawbhalang Dhar. Haba kren sha ki lad pathai khubor u General Secretary ka JSU u samla Neilkee Mukhim u la ong “Ngi dawa jur ia ka Sorkar bad ka MPSC ban buh ia ka MSPC exam centre ha Ri-lum Jaintia khlem ka jingpynslem shuh. Kane kan weng ia ki jingeh ba mad da ki samla pule, khamtam kito kiba wan na ki longiing ba duna ka jingioh, bad pynthikna ia kajuh ka lad ban ioh iakhun ia ki eksamin”. U samla Neilkee u la ong ba ka jingbym don ka MPSC exam centre ha Ri-lum Jaintia kala wanrah ia ka jingeh kaba khraw ia ki samla pule na ka thain.

“Ki samla pule na ki jaka kyndong jong ka East bad West Jaintia Hills ki hap ban wan shaduh sha Shillong ban ialeh ia ka eksam MPSC, kaba shim ia ka por bad lutksan. Ka jingjur ka dhengkali khamtam ha ki por longskul/longtrei, ka ju lam sha ka jingslem, ka khanglad ia ki samla pule ban poi sha ki jaka thoh eksam ha ka por kaba biang. Kito kiba poi slem ki duh ban rung, kaba lam sha ka jingduh ei ia ka lad” la ong u samla Neilkee.

U la ong ruh ba watla ki don bun bha ki nongaplai kam na Ri-lum Jaintia, ka jingbym don ia ka examination centre ha ka thain kala buh ia ki ha ka jingduhnong kaba khraw haba ianujor bad ki samla pule na kiwei ki District kiba lah ban poi suk sha ki exam centre.“Watla ka Ophis ka MPSC Cell ka don ha Jowai West Jaintia Hills hynrei ka jingshakri ka long kaba duna eh namar kajingbym don ia ka examination centre. Ki samla pule kin hap ban wan sha Shillong ban pyndep ia ki kam namar ka jingbym treikam bha jong kane ka Ophis kat kum ka jingthmu bala buh ia ka” u la ong.