Dawa ka KHADC ia ka sorkar ban pyllait ka bhah khajna ba T.50 klur

Ka Executive Committee (EC) ka Khasi Hills Autonomous District Council (KHADC) hapoh ka jingialam u Chief Executive Member (CEM) u Bah Winston Tony Lyngdoh hynne ka sngi, ka la leit kynduh ia u Symbud Myntri Rangbah ka Jylla u Bah Prestone Tynsong ban dawa pyllait noh ia ka bhah khajna ba sahteng ka Council na ki marpoh khyndew ba kot T.50 klur.Haba kren sha ki lad pathai khubor u Bah Winston u la pyntip ba u Bah Prestone u la kular ban sa khmih khia ia kane ka kam bad tyrwa ia ki katto katne ki jingai jingmut ban pynjanai ia ka jingiaid ka pisa tyngka, haba kyntu ban iatreilang bad u Secretary bad Joint Secretary ka tnat District Council Affairs (DCA).

Halor ka jingtyrwa ka Sorkar ban siew ia ka tulop sha ki nongtrei ki ADC, u CEM ula ong ba ha ka jingialang bad ka Deputy Commissioner bad ki Ophisar ba dei khmih, ula pynpaw ba ia ka jingai jingiarap song pisa-grant ne kiwei kiwei-bala mynjur iaka GHADC dei ruh ban ailang sha ka KHADC.“Lada ka Sorkar ka pyllait ia ka bhah jong ngi ha ka por kaba dei, ka KHADC kan nym don jingeh ban pynthikna ia ka jing treikam ba iaid beit iaid ryntih ha ka Council” ula bynrap.U ong ba u Symbud Myntri Rangbah lehse ula ioh pdiang ia ka kaiphod jong ka Sub Committee (kaba la bynshet ia ka kam ban iakren bad ka KHADC halor ka jingtyrwa ka Sorkar), hynrei ma u dalade um pat shym la ioh satia ia ka. Ula pyntip ba ka bhah khajna ba dei ban ioh ka KHADC na ka Sorkar ka long T.60-70 klur, hynrei T.20 klur lah dep pyllait dang shen, kaba pynsahteng sa kumba T.50 klur.

“Lada ka Sorkar ka burom ia kaei kaba ka dei ban siew, ngi lah ban pynthikna ia ka jingtreikam kaba iaid beit iaid ryntih ha ka Council” ula ong.Halor ki jingeh ba iakynduh da ki MDC na ki constituency ha ki jaka sor, u CEM ula ong ba ha ka jingialang, u Bah Prestone ula kubur ia ka jingeh bad pyntip ba un sa lum ia ka jingialang bad kine ki MDC ban pynbeit ia kine ki jingeh.U CEM ula pynpaw ba ka jngeh ka mih na ka kyndon ba pynthymmai bala buh da ka 15th Finance Commission, kaba lah jan kut artad ka samoi jong ka.U Myntri Rangbah ulakular ba ka Sorkar kan sa pan ia ki jingtyrwa beit beit na ki MDC jong ki constituency ba don ha ki jaka sor.