Dawa ka RCDC ban thaw Regional Council ia ki rit paid ha Meghalaya

Ka Regional Council Demand Committee (RCDC) ba mihkhmat ïa ki jaitbynriew rit paid kynthup ki Hajong, Koch, Rabha, Boro, bad Mann hynne ka sngi ki la kynduh ïa u Lat ka Jylla Meghalaya u CH Vijayashankar ban dawa thaw da ka Regional Council na ka bynta ki jaitbynriew rit paid katkum ki kyndon jong ka riti synshar ka ri bad ka histori. Haba kren sha ki lad pathai khubor u Chairman ka RCDC uba dei ruh u Myntri Sorkar barim u Dr KC Boro u la ong “Ngi la dawa na u Lat ka Jylla ban thaw da ka Regional Council bad ngi la kyrpad ba un shim khia halor kane ka jindawa”. Ka RCDC ka la kyrpad ïa u Lat ban pyndonkam ïa ki bor ba la ai katkum ki kyndon 244(2) bad 275(1) jong ka riti synshar ka ri ban thaw ïa ka Regional Council, da kaba kdew ïa ki kyndon jong ka riti synshar ka ri hapoh ka Khyrnit kaba hynriew jong ka Riti Synshar ka Ri India bad ki jingeh ba shisha jong ki jaidbynriew rit paid. “Ngi ki jaitbynriew rit paid jong ka jylla Meghalaya ngi kwah ban im da ka roi ka par bad ka burom kum kiwei pat ki jaidbynriew kiba la kiew shaphrang ha ka Jylla” u la pynpaw.

“Ngi sngew donkam ïa ka Regional Council, ka ban long ka lad ba khatduh jong ngi ban im bad ban roi.” Ka jaka ba la tyrwa ban thaw da ka Regional Council ka heh kumba 1,987 sqkm, ha kaba ki nongshong shnong ki don kumba 1,97,718 ngut ki riewlum rit paid. Ka dorkhas bala aiti ha u Lat ka Jylla kadei ruh ka jingpynkynmaw, kaba la kyrshan ruh da ka Meghalaya Indigenous Minority Tribals’ Forum (MIMTF), ka pynpaw ïa ka jingshah iehnoh beiñ bad shah kyntait ha ka histori jong kine ki jaidbynriew rit paid, da kaba kdew ïa ki nuksa jong ka jingbymhok, jingshah lehbeiñ watla ki dei ki trai ri trai muluk ha ka Jylla Meghalaya. Ka dorkhas kala kdew ruh ba kine ki jaidbynriew rit paid ki dang sahdien ha ka pule puthi, ka ioh ka kot, bad ka sain hima haba ianujor bad ki jaitbynriew kiba heh jong ka jylla Meghalaya. Ka RCDC ka kynnoh ruh ba ka bhah kyrpang kaba mynta ka long kaba pynioh nong tang ia ki jaitbynriew Garo, Khasi, bad Jaiñtia, kiba la ïoh 80% na ka bhah, kaba sah tang 5% na ka bynta ki jaitbynriew rit paid, ki Scheduled Caste, bad kiwei kiwei ki jaitbynriew bym dei ki trai ri trai muluk.

“Kane ka ïaryngkat bad ka jingbym bhah kyrpang ïa ki Minority Scheduled Tribe hapoh ka Jylla kiba ka jingdon briew jong ki baroh ka long haduh 3 Lak ngut ha ka Jylla” ong ka RCDC. Kala kynnoh ba ka jingpyntreikam ia ka Reservation Roster Policy naduh u snem 2025 kala khmih lynti ba kan nang pynjur shuh shuh ia ka jinglong jingman, kaba pynlong ia ki riewlum rit paid ban kham eh shuh shuh ban ioh kam Sorkar. Ka RCDC ka la kynnoh ruh ba ka don ka jingshim kabu ha ka sain hima pyrthei, da kaba ong ba ka jingphiah ia ki constituency ha u snem 2013 la leh ha ka rukom kaba pynduna ia ki jaka rit paid kaba la pynlong ia ka jingbym don nongmihkhmat ha ka iing dorbar thawain ka Jylla Meghalaya. “Ka long shisha kaba sngewsih ba haba ki Muslim ki don 2 ngut ki MLA ha Meghalaya Assembly, ngi ki Minority Schedule Tribe ngim don wat tang uwei ruh u MLA” kala ong.