Dawa ka Shnong Mawryngkneng da ka ‘Artificial Turf’ ha Mini Stadium

Ka Dorbar Shnong Mawryngkneng hynne ka sngi ka la leit aiti ia ka dorkhas sha u Myntri Rangbah ka jylla u Conrad Sangma ban pynkynmaw halor ka jingdawa ban buh ia ka madan Artificial Turf ha Mawryngkneng Mini Stadium. Ha kane ka sngi, ka Dorbar shnong Mawryngkneng ryngkat ka jingsynran lang u CEM barim ka KHADC u bah Pyniaid Sing Syiem, ki la aiti ruh ia ka dorkhas ban kyntu ban kyntiew kyrdan noh ia ka Government Community College, ban kyntiew kyrdan ia ka Mini Staium bad ban buh noh ia ka Multipurpose Hall ha kane ka shnong, khnang ban long ka jingmyntoi ia ki paidbah nongshong shnong ka thain baroh kawei.

U General Secretary ka Dorbar shnong Mawryngkneng u bah Shiningstar Kharbihkhiew ha ka shithi, ula pynkynmaw ba ha u snem 2022, ka Dorbar ka ladep aiti ia ka dorkhas ban dawa ban buh ia ka madan Aritificial Turf ha katei ka shnong, khnang ban long ka jingmyntoi bad ban kyntiew ia ki samla kiba don ia ka sap lehkai. U bah Shiningstar ula ong ba ka shnong ka la donkam eh ban kyntiew kyrdan ia ka Mini Stadium namar ba haduh mynta ka Mawryngkneng Cultural Sports Club (MCSC) kadei ka club kaba la ju sei bun ki nongialehkai kiba tbit bad kiba kynsai bha ha ka jylla ban don napdeng jong ki, kiba la mihkhmat ruh ia ka ri.

Ka Dorbar shnong ka la kyntu ia u Myntri Rangbah ka jylla ban shimkhia kloi ia kine ki jingdawa kiba dei ka jingangnud ba la slem jong ki paidbah ka shnong.