Dawa ka Synjuk 12 shnong bad kiba haiing ban set phatok shi jingim ia kiba pyniap

Ka sur ba jam ka la sawa ban set along shi jingim ïa ki briew ba donkti ban pynïap ïa u bah Kerang Sawkmie ha ka 6 tarik u Rymphang, 2026.

Mynta ka sngi la pynlong ia ka jingiaid rally ban pynrem ia katei ka jingjia bad la shim bynta da ka seng KSU Nongkhlaw Circle, ki khynnah skul, ka synjuk ki 12 tylli ki dorbar shnong ka thain Maroid, kiba ha ïing hasem u bah Kerang Sawkmie bad ki paidbah nongshong shnong bad la pynkut da jingïalang paidbah la pynlong da ka dorbar Shnong Nongthymmai, Eastern West Khasi Hills District.

Baroh ki Nongkren ki la pynrem jur ïa ka jingshah pynïap u bah Kerang ha la ki jong ki kñi bad ki la dawa na ki bor jong ka ain ba ki dei ban pynshitom tyngeh ïa kine briew bad ban set phatok shi jingim bad ki la ong ruh ba ka jingshah pynïap u bah Kerang ka long kaba sngewtriem ha kaba ym ïoh shuh ban lehniam khatduh ïa ka met jong u.

Na ka liang ki Nongïalam shnong ki la ïathuh ba kine ki kñi u bah Kerang Sawkmie ki dei kiba ju pynthud bha ïa ka imlang sahlang bad kim don shnong ha Nongthymmai wat la kha ha Nongthymmai hynrei ki la wan sah ha Nongthymmai hadien ba ki la shah beh ha ki lok jong ki.

Ki la ïathuh ruh ba uwei na ki kñi u bah Kerang na ka por sha ka por ula shah bishar ha ka shnong bad la bun sien la aiti ïa u ha ka ain hynrei ki bor jong ka ain ki ong ba u dei uba don jingduna, hynrei mynta une u briew ula donkti ban pynïap syndon ïa la u khun pyrsa.

Ki Nongïalam shnong ki la ïathuh ruh ba na ka liang kiba ha ïing u bah Kerang Sawkmie ki la kyrpad ïa ka shnong ban ïa shnohktilang ban dawa na ki bor jong ka ain ban set noh jingim ha along ïa ki kine ki briew bad ka shnong ruh ka pynpaw ba kam kwah shuh ba kine ki briew kin dang wan phai hapoh shnong.

Ka jingtohkit ïa ki 3 ngut ki briew kiba la shah kem ha ki pulit halor ka jingshah pynïap u bah Kerang Sawkmie ïa uba la suba ruh ba u la shah thang ha ka ding ka dang ïaid shakhmat bad kine kiba la shah kem ki kynthup ïa ar ngut ki kñi trai u bah Kerang bad uwei u paralok.