Dawa ki MDC VPP ban pynlong ‘Special Session’ ha JHADC

Halor ka jingpynjari korphiw ki bor shynshar district ha shnong Lapangap West Jaiñtia Hills District bad ruh ka jingkhang ban sangeh shwa ka jingot kba hadien ba la mih ki jingkulmar hapdeng ki jaitbynriew Karbi na Assam bad ki jaitbynriew Pnar na Meghalaya, mynta ka sngi ki MDC, VPP ka Jaiñtia Hills Autonomous District Council hapoh ka jingialam u Awhai Andrew Shullai kum u nongialam ka liang pyrshah ki la pynpaw ka jingpyrshah jur ia ka jingleh ka sorkar da kaba ong ha jingshisha kum kane ka por ba ki paidbah ki dei ban ot kba ba ki la trei shitom baroh shisnem ka sorkar ka dei pynbiang pura ki lad jingiada hynrei pynban ka khang ia ki ban ot kba.

Haba pynrem ia ka jingkren u Myntri Rangbah duh ka sorkar u Awhai Andrew Shullai ula ong, kane kan ktah bha ia ki paidbah katei ka shnong namar da ei pat kin bam ha u snem ban wan. U pynrem ruh ia ka jingkren u CEM ka Karbi Anglong Autonomous Council uba kam ia ka block 1 bad block 2. Haba ia dei bad kane ka jingjia ha Lapangap ki MDC VPP, ki la ai jingthoh sha u CEM ka JHADC bad dawa ban pyllong ia ka Special Session kyrpang ban wanrah ka jingiatylli jingmut lang bad yn wanrah da resolution ha ka iing dorbar ba ki jaka ka JHADC kiba don ha ki jaka iakajia pud yn pynskhem bad ai ki lada jingiada. Ha kajuh ka por ki ong lada u Myntri Rangbahduh ka sorkar jylla um shah ia ki paidbah ka shnong Lapangap ban ot kba lane ban pynbiang ki lad jingiada, wat haba ki la ioh ban thung ban wer kumta dei ban siew bai lutsan shaki, namar ba ka por kam ap shuh.

U Jamshaphrang Pohtam u ong ka jingpyntreikam ia ka Curfew ha katei ka thaiñ ka la ktah bha namar u kba dei ka jingim ki briew, ym kum ka pisa kaba lah ban buh shwa ha bank bad sa sei pat hadien ruh, hynrei ia u kba ym lah ban leh kumta. Shuh shuh u bynrap lada ka sorkar jylla ka ong, ka long ba khlaiñ lyngba ka jingdon ki 51 ngut ki MLA katba ha ki jri siat sim pat ki tieng, ka pyni ba kane ka sorkar dei ba kop sarong bad ba la tlot ka jingtreikam.