Dawa u MLA ban tohkit ba khynra ka GHADC ha Rajabala Market

U MLA ka Rajala constituency u Dr Mizanur Rahman Kazi ula phah da ka jingthoh sha u Myntri Rangbah ka Jylla u Conrad K Sangma ban dawa tohkit da kaba kynnoh ba don ka jingleh bym hok ha ka por khynra ha Rajabala Market. Lah ban kdew ba haka 15 tarik Risaw ka Garo Hills Autonomous District Council (GHADC) ha ka jingiatreilang bad ki seng mon trei sngewbha Non-Governmental Organizations (NGOs) kila pynlong ka jingkhynra ha Rajabala Bazar. Haka shithi sha u Myntri Rangbah ka Jylla, u MLA ka Rajala constituency u Dr Mizanur Rahman Kazi ula kynnoh ba ka jingkhynra ha Rajabala Market kam long kaba khuid bad kaba hok bad ula kynnoh ruh ba ka long ka jingpynkhien iaka hok long briew man briew.

“Kum u MLA nga la leit jurip iaka Rajabala Market bad nga la ioh shibun ki jingujor naki paidbah kiba la kynnoh ba ka jingkhynra ki bor pyniaid ka GHADC bad ki seng mon trei sngewbha ka long ka bym iahap bad khlem da bud ryntih iaki kyndon ain” la kynnoh u Mizanur. U MLA ula kynnoh ruh ba ki bor pyniaid ka GHADC kim shym sa phah Notice sha ki paidbah khamtam shaki nong shong dukan hashuwa ban pynlong ka jingkhynra. “Ki bor pyniaid ka GHADC ki da jied briew ban khynra bad kum kane ka lah ban wanrah ka jingiapher jingmut hapdeng ki nong shong shnong” ula kynnoh.

“Ka donkam iaka Sorkar ban thaw daka kynhun tohkit lane ka (High-Level Committee) ban tohkit iaki sienjam ba shim ka GHADC haka jingdonlang ki seng trei mon sngewbha haka por ba ki pynlong ka jingkhynra ha Rajabala Market khnang ban wanrah biang ka jingiatylli hapdeng ki nong shong shnong hapoh ka thain” ula ong.