Dei ban buh ki kor ringdur CCTV na shadien ban tehlakam ia ki nongtuh

U Nongialam ka Liang Pyrshah u bah Titosstar Chyne ula ai jingmut ia ka EC ha KHADC ba ka dei ban buh bun ia ki kor ringdur ne CCTV ha bar bad hadien iing ka MDC Hostel bad ka dei ban pynkhlain ia ki bor pahara, khnang ban tehlakam ia ka kam tuh kam thiem.

U bah Titos ula ai jingmut hadien ha ka kynta ba la wanrah ia ka mat iatai da u MDC ka Shella u bah Barikupar Synrem hynne ka sngi Iing Dorbar halor ka jingprong tuh ki runar ha kamra ka ophis ka Council.

U Nongialam ka Liang pyrshah ula ai jingmut ruh ba ka EC kadei ban thoh sha ka sorkar ban pan bor pahara namar haduh mynta don tang ki Chowkidar ha Council.

Ula ong ba ha ophis ka Council ki don bun ki tiar ba remdor bad dei ban husiar ioh lehse kin jah sa ki tiar kiba kham rem dor.

“Kane kam da dei ka jingjia kaba phylla namar ia u nongtuh ym tip lypa bad u lah ban rung ha kano kano ka por,” ula ong.

Ula ong ka jingshah tuh na ka kamra u EM ha Council, lehse ka lah ban dei ka sien kaba nyngkong bad kan long ruh ka jingsngew lehrain namar jingkat na ophis kan don kane ka jingshah tuh.

“Watla ka dei tang T.2000, hynrei kane kan dei ka jinghikai ia ngi ba kum ka ophis ba ngim dei ban buh pisa ha ki kamra ophis, la ka long ha ki tnad ne ki kamra trei,” la ai jingmut u bah Titos.

Haba pynshai halor kane, u CEM ka KHADC u bah Tony Winston Lyngdoh ula ong ba ka ophis ka la ujor ia ka ejahar bad ka jingtohkit na ka liang ki pulit ruh ka dang iaid.

Ha kajuh ka por ula pdiang ia ki jingai jingmut jong u nongialam ka liang Pyrshah bad ula pyntip ba ka ophis ka la buh haduh 32 tylli ki kor CCTV ba la pynieng ha kane ka ophis.

U la ong ba na ka liang ka EC kan sa peit ia ki jaka ba dang duna ki CCTV bad kin sa leh ia kaba donkam.

Ula iathuh ruh ba haduh mynta ki don 7 ngut ki Chowkidar kiba peit ia ka ophis bad kin sa nang pynkhlain shuh shuh ia ki bor pahara.