Ban lum ban lang bad ban pynneh pynsah ia ka jingithuh ia la ki para kur ha ryngkat ka jingiatylli lang kawei, na ka liang ka Seng Kur Lapang Pyllun ka la ioh ban pynlong ia ka jingiakynduh lang kaba shisien shisnem kaba dei ruh ka sien kaba 7 ba kum ki para kur kin ia kynduhlang ban ia mir jingmut halor kiba bun ki mat ia kaba la pynlong ha ka madan jong ka shnong Umdihar ha Ri Bhoi District. Lyngba kane ka jingiakynduhlang, kaba la pynlong kyrpang ban ia ithuh ithaw ban pynneh ia ka jingiaieid ia tylli, la wan ban ai mynsiem kyrpang ia ki para kur da u Kni rangbah ka Kur Lapang u Maheh Dr. D.D Lapang u ba la shim ia ka bynta kaba khraw ban ai ia ki kyntien kyntu kynpham bad ban sneng ban kraw ia ki hymmen, ki pyrsa baroh. Haba ai ia ka jingkren ha kane ka sngi, u Maheh Lapang u la ai khublei snem thymmai kaba suk kaba kmen ia baroh ki para Kur ba kin nang roi parum pareh ha ryngkat ka jingkoit jingkhiah bad ban nang kiew ha ka jingim kaba man ka sngi, da kaba sneng kyrpang, ba kum ki para Kur ki dei ban sdang ia ka jingiaid lynti jong ka jingim ka jong ki da ka jingsngewrit namar lada phi sngewrit shisien ka sngi, phin sa long khraw namar ka jingsngewsarong kan pynjot ia ki ha kiba bun ki bynta.
U la ong ruh, ba kum ki longkmie ki longkpa, ki khun samla ka Kur Lapang, ba ki dei ban iaid ha ka lynti kaba hok haba ki trei ha kino kino ki kam bad ba kim dei ban don ia ka ktien bym lah hynrei ban treishitom tad haduh ban da kheit ia u soh jong ka jingjop ha ki bynta ba ki don, ha kaba u la pynpaw ruh ia ka jingkmen kaba khraw ban nang sakhi ba kum ki para kur hi ki dang long kiba iaineh bad iai tehsong na kawei ka snem sha kawei pat. Shuh shuh ruh, kum u kni rangbah ka Kur Lapang, u la ai khublei kyrpang ia baroh ki nongkitkam jong ka Kur kiba la nang iai treishitrhem ban lur ban bah ia ka jingkitkhlieh ban peit ia ka bha ka miat bad ki jingeh baroh khlem da kynran dien watla ki mad ia shibun ki jingeh, bad u la kyntu ruh ia ki nongkitkam baroh ba kin nang pynneh ia kane ka mynsiem ban trei shitrhem khlem da kynrandien, da kaba kitbok kitrwiang ia baroh ki para Kur kiba la poi sha kane ka jingiakynduhlang bad ia kito ki bym shem la donlang ruh ba kin nangroi parum pareh.
Lyngba kane ka sngi, la pynphuh pynphieng ia ka jingiakynduhlang da ki jingrwai bad ki jingshad na ki samla bad ki heprit bad la pynkup burom ruh ia ki nongkitkam ba thymmai ba thymmai jong ka samoi 2025-2028 kiba la jied ia u Bah Tynshain Lapang kum u President, Bah Kendrowel Lapang kum u Vice President, Baiateilang Lapang Chief Adviser, Dr. D.D Lapang, Adviser, Bah J.W Lapang General Secretary, Bah Albertus Lapang nalor kiwei kiwei.