Don 236 ngut kiba ioh ia ka jingpang Japanese Encephalitis ha ki 3 snem: Ampareen

Ka Myntri ka tnad ka koit ka khiah ka jylla ka Kong Ampareen Lyngdoh ka la iathuh ba ki don 236 ngut kiba ioh ia ka jingpang Japanese Encephalitis (JE) ha ki lai snem. Ka Myntri haba jubab ia ka jingkylli ba la wanrah da ka MLA ka TMC ka Miani D. Shira hynne ka sngi ha Iingdorbar Thawain ka jylla, ka la iathuh ba ha u snem 2023-24 ka jingdon ki briew kiba ioh ia kane ka jingpang JE ki long 89 ngut bad ha u snem 2024-25 ki don 147 ngut. Ha ka jubab ba la wanrah ha Iing Dorbar, la pyni ba kane ka jingpang ha u snem 2024-25 ka kham jur ha West Jaintia Hills ha kaba ki don haduh 83 ngut, East Khasi Hills 39 ngut, Ri Bhoi 50 ngut, East Jaintia 27 ngut, Eastern West Khasi Hills 13 ngut, West Khasi Hills 10 ngut, South West Khasi Hills 9 ngut, South West Garo Hills 4 ngut bad ha South Garo Hills don iwei.

Ka Myntri ka tnad ka koit ka khiah, ka la iathuh ruh ba ki briew kiba la khlad noh na kane ka jingpang ki don 18 ngut. Katkum ka jingiathuh ka Myntri, ki kham bun ki khynnah kyllung kiba ioh ia kane ka jingpang Japanese Encephalitis namar ka jingkylla ka suin bneng bad kane ka jingpang ka jur ha ki jaka ba bun ki skain pyrjong. Halor ka jingkylli kiei ki lad ban iada na une u khniang jingpang, ka Myntri ka la iathuh ba ka sorkar ka la shim ia kiba bun ki sienjam ban iada na kane ka jingpang ha kaba kala buh ia ki Lab kiba kyrpang ban pynlong ia ka jingkhmih bniah, kila pynlong ruh ia ki prokram ban pynshai paidbah bad la pyllong ruh ia ki prokram ban ai dawai injek ha man ki district, nalor kiwei de.

Na ka liang ka MLA ka TMC ka la pynpaw ka jingsngewkhia halor ka jingpar sted kane ka jingpang, bad ka la ai jingmut ia ka sorkar ba kadei ban bthah ia ki nongtrei ha ka koit ka khiah ba kin long phikir bad kidei ban peit bniah ia ki dak ki shin kiba ioh ia kane ka jingpang. Halor ka jingkylli bynrap u MLA ka VPP u bah Ardent Miller Basaiawmoit halor ki daw ba duna ki kes ha Garo Hills haba ianujor bad ka Khasi bad Jaintia Hills, ka Kong Ampareen ka la ong ba ka jingai injekshon ka kham jur bha ha thain Rilum Garo.