Don 39 ngut ki Consultant shimet, 69 ki Company Consultant

U Myntri Rangbah ka Jylla u Conrad K Sangma hynne ka sngi ula pyntip ba lyngba ka jingdon ki Consultant ka Jylla ka la lah ban ioh palat T.7,427 klur ki project bad T.2400 klur na ka Sorkar Pdeng na bynta ka Meghalaya Economic Growth Corridor. Ia kane u Conrad ula pyntip haba jubab ia ka jingkylli ba la wanrah da u MLA ka VPP na Mawlai constituency u Bah Brightstarwell Marbaniang hapoh ka Iingdorbar Thaw Ain halor ka rai jong ka Sorkar ban thung ia ki Consultant. Haba jubab ia ka jingkylli u Conrad ula ïathuh ba ki don haduh 39 ngut ki Consultant shimet bad 69 tylli ki Company consultant la ai kam hapoh ka Jylla. U Conrad u la ong ba ka jingthung ia ki Consultang, ka Sorkar Jylla ka la lah ban wanrah haduh 13 tylli ki Project ba bei tyngka na shabar lane ki Externally Aided Project bad ia kine ki Project la ioh wat hapdeng ka jingiaknieh bad ki Jylla jong ka Ri India bad kiwei ki Ri.

“Namar ka jingdon ki Consultant, ngi la lah ban pyndep iaki jingdonkam haka por kaba biang bad ngi la ioh ia ka song pisa ba palat T.7,427 klur” la ong u Conrad. Haba pynksan iaka jingdonkam ban don Consultang, u Myntri Rangbah u la ong “Ngi la leit bad iakynduh ia ka Myntri Pla Tyngka Sorkar Pdeng bad kala bthah ia ngi ban aiti noh mar mar ia ka Detailed Project Report (DPR) haba iadei bad ka Meghalaya Economic Growth Corridor project hapoh ar kynta. Tang namar ka jingdon ki consultant ba ngi thung, ngi la lah ban pyndep hapoh ka 7 sngi bad ngi la ioh ia ka mang tyngka ba T.2400 klur na ka Ministry of Finance”. U la kam ruh ba ka Meghalaya ka dei ka Jylla ba nyngkong ban buh ia ka jingtyrwa ia ka project Utility Mall ba T.132 klur bad pyntip ba ia kane ka mall yn sa pyniaid da ki samla ka Jylla.

U Myntri Rangbah u la pyntip ruh ba nalor ba don ki Consultant na bar ka Jylla, ka Srokar kala shim ruh iaki sienjam ban pyntbit ia ki sap treikam jong ki samla shynrang bad kynthei ka Jylla ba kin trei ia ki kam consultant.“Myn shuwa, kumba 2-3% eh ki samla trai Jylla kila trei ha ki kompani consultant. Hynrei, mynta ngi la jan kot ia ka 30% ha kine ki 5-6 snem bala leit noh” u la ong. U la pynksan ruh baka jingthung Consultang kam ktah satia iaka pla tyngka joing ka Jylla namar tang 1% na ka dor jong ka project la siew sha ki Consultant.