Don bun ki jaka shangkai ha Sohrarim, hynrei ka sorkar kam iarap: Bosestarwell

Ka jingpaw nam ka Sohra kylleng ka pyrthei ha ka kam jngohkai, ka la khring ia ki briew satlak ban hiar ban leit jgnohkai sha katei ka thain. Hynrei kane ka jingpawnam ka Sohra, kam pat lah ban pynmyntoi lang ia kiwei ki shnong kiba don ha katei ka thain. Ka shnong Sohrarim kaba don katto katne kilometer shwa ban poi sha Sohra, kam pat ioh jingmyntoi than na ka nam ka Sohra ha ka kam jngohkai pyrthei. Haba kren bad u Sordar ka shnong Sohrarim u bah Bosestarwell Diengdoh u la iathuh ba ka shnong ka don 150 tnum iing eiei bad ka kam ba kongsan ka dei ka kam bylla sha kiwei ki shnong namar ba ka shem jingjynjar ban bylla ha shnong namar ba kam don ka jaka rep jaka riang kaba biang.

 “Kaba khmih lynti nangne shakhmat, ia ka lad ioh kam ioh jam ka dei sa tang ka kam jngohkai, ha kaba ka shnong ka don shibun ki jaka jngohkai kiba itynnad bad ki khana pateng”, la ong u Sordar. U la iathuh ba watla ka shnong ka la wad ia ki lad ki lynti na ki nongmihkhmat, na ka tnad jngohkai hynrei kam pat urlong satia ia ka jingdonkam jong ka shnong.“La bun ki lad ki lynti ngi la wad na ki nongmihkhmat, na ka tnad jngohkai hynrei ki lad ki kut noh namar ba haba iadei bad ka sorkar hap ban iaid bun snem”, la ong u bah Bosestarwell. Ki jaka kiba lah ban khring ia ki nongwankai ki dei ka iew hyndai, ka wah nonglyer, ka law kyntang bad kiwei.

Haduh mynta, dei tang ka wah nonglyer kaba la shna hi ka shnong na ka skhim 100 sngi, ka ban sa plie noh shen. Ha kajuh ka por, u Sordar ula kyntu ia ka bor sorkar ba kan phaikhmat sha ka shnong kaba don shibun ki jaka jngohkai ban kyntiew ia kane ka kam shang suwari, na ka bynta ka jingmyntoi jong ki nongshong shnong.