Don ka Sixth Schedule phin lait na ka CAA, ka jubab u Amit Shah, ong u Bah Prestone

U Symbud Myntri Rangbah ka jylla u bah Prestone Tynsong ula iaroh ia ka samoi treikam ki MDC jong u 2019-2024 jong ka KHADC. “Ka samoi ne term ka KHADC naduh 2019 haduh 2024, ka dei kaba la leh ia ki kam bah kam san, kiba la wanrah ia ki jingkylla kaba bun hapdeng ka jingkylla ki CEM na por sha ka por ha kine ki 6 snem”, la ong u bah Prestone. U bah Prestone ula iashim bynta ha ka prokram pyllait ia ki 16 tylli ki kot wad bniah halor ki riti dustur kaba la pyllong ka KHADC mynta ka sngi ha State Convention Centre, Shillong. U bah Prestone uba peit ia ka tnad District Council Affair (DCA), ula ong ruh ba ka sorkar ka peit ia ki khmat sha ki 3 tylli ki ADC, namar ba dei ka District Council kaba ai ka jingiada ia ka jylla ia ki Khasi, Jaiñtia bad Garo. “Da kaba burom, sngewsih ba ka jingkhmih lynti ki paidbah kam long hynrei mynta shibun bah ki aiñ ki kanun ki la thaw ryngkat ka jingiatreilang bad ka sorkar”, la ong u bah Prestone. Khnang ban pyniaid beit ia ki Bill ba la mynjur ki district council, ka sorkar kala thaw ia ka Standing Committee ha kaba ka don ka jingiasyllok hapdeng ki district council bad ka sorkar jylla shwa ba kin thaw ia ki ain bad hadien ba la thaw kila phah sha u Lat.

Ha kajuh ka por u bah Prestone ula pynshai halor ki hamsaia ba don kiba ong ba ka sorkar kan knieh ia ki bor ki ADC, kata ka dei kaba bakla.”Nga dei uba kwah ban pynkhlain ia ki ADC, bad kata ka shong ha ki MDC. Nga peit ia ka DCA, ngi don ka jingkitkhlieh ban pynbiang ia ka jylla bad ha ADC,” ong u bah Prestone. Ula ong ba ki liangpyrshah bad liangsynshar ki la iatreilang haba don kano kano ka Bill ha kine ki 6 snem. U Symbud Myntri ka u bah Prestone ula pynkynmaw ha ka por ba wanrah ka sorkar ia ka CAB, ka thain Lammihngi ka ialum baroh ki seng sain pyrthei ka ha Guwahati bad la ia rai ban leit iakhun sha Delhi ban pynpaw hakhmat ka sorkar India, ban pyrshah ia ka CAB.

 “Ynda la poi ha Delhi ngi la ioh shilain ka jubab na u Amit Shah uba pynsngew ba lada pass ia ka CAB ban kylla ia ka CAA,  don ka Sixth Schedule, phin shah pyllait  na ka CAA. Kane ka dei ka jingdonkam ka Sixth Schedule namar ba don kiba ong ba hana ka Sixth Schedule kam long, kam donkam, kito kiba sngewthuh bakla, sngewbha ngam kham jylliew ban sngewthuh ia ka dor bad ka bor ka Sixth Schedule,” ong u Symbud Myntri Rangbah. Ha kane ka sngi la ioh ruh ka jingkren na u CEM ka KHADC, u Chairman ka Research Committee ka KHADC u bah Carnes Sohshang nalor kiwei de.