Donkam ka jingiatreilang na ki paidbah ban weng ka jingma na u drok

Ka Central Bureau of Communication, Shillong ka la pynlong ia ki prokram ai jingtip shaphang ka jingktah jong ka jingpyndonkam ia ki jingdih pynbuaid hapoh ka ‘Nasha Mukt Bharat Abhiyan’ ha ka shnong Pathew bad Markasa ha Eastern West Khasi Hills.Ia ka prokram ba nyngkong la pynlong ha Parïong PHC ha ka shnong Pathew ha kaba ki nongshong shnong ki la wan iashim bynta ia kaba la ialam da u Rangbah Shnong u Bah A Marngar. U Dr. L.S.L Kharkongor, incharge ka PHC ula pynpaw ia ka jingkhuslai halor ka jingpur ka jingpyndonkam ia ki drok ha kane ka thain bad ula batai shaphang ka jingktah jong ki jingdih kiba sniew. “Ka jingdih drok kam dei ka jingeh shimet, ka ktah ia ka longiing, ka shnong bad ka imlang sahlang,” ula ong bad ka ban jur halor ka jingdonkam ia ki sienjam ba ban peit bniah ia ka rukom ai jingsumar bad ruh ka jingiada ha ryngkat ki prokram ai jingtip. U Bah E. Marbaniang, SI ka Mairang Police Station ula kren shaphang ki jingktah ka jingdih drok, ki jingpynshitom katkum ka ain bad ka jingdonkam ia ki kmie ki kpa ba kin peit bha ia ki khun.

Ula ong ba ka jingdih ia ki drok kum u Opium, kynja bad kiwei kiwei ki jait, ka ktah bha ia ka jingim bad ka jingdih drok ka ktah ia ka jingmut jingpyrkhat bad ia ka koit ka khiah. Kumta dei ban sngewthuh ia la ki jong ki jingbah khlieh ban don ka jingim ba koit ba khiah.Ula bynrap ban weng ia ka jingma jong u drok na ka imlang sahlang, ka long kaba donkam ban ioh ia ka jingiatreilang na ki paidbah bad ula ban jur ba ki briew ki dei ban ai jingtip shaphang kito kiba la ngop ha u drok bad kino kino kiba die drok ha ki thain khnang ba ki pulit ki lah ban shim kloi ia ki sienjam. Kane ka kam jong ka Bureau ka long shi bynta kaba kham iar jong ka Sorkar ban iakhun pyrshah ia ka jingngop ha ki drok bad wanrah ia ka imlang sahlang kaba lait na ki drok lyngba ka jingai jinghikai, ka jingshim ia ki sienjam bad ki kam ha ka imlang sahlang.

Ha ka prokram ba la pynlong ha ka Dorbar Hall jong ka shong Markasa, ka Kong Susanna L Lyngkhoi, Block Coordinator SBMG Mawthadraishan Block ka la ban jur halor ka jingkongsan ban sangeh ia ka jingthang ia ki niut plastik bad ka la kren ruh shaphang ka jingdonkam ban tih ia ki thliew painkhana bad ka jingkit khlieh ban pynthikna ia ka jingkhuid jingsuba.U nonghikai ka skul Markasa Sec. School u Bah D L Marsianbai ula ong, haba u briew u ngop ha ki jingdih pynbuaid, um buh jingma tang ia ka jingim lajong hynrei ka ktah ruh ia ka longiing, ka shnong bad ka imlang sahlang. Ka Bureau ka la pynlong ruh ia ki jingiakop shad bad quiz kum shi bynta kane ka prokram bad ki nongjop ki la ioh ia ki buskit song tyngka. Ka la don ruh ka jingthung dieng hapoh ka ‘Ek Ped Maa Ke Naam’ bad la pynlong ruh ia ka jingpynkhuid shnong.

Leave a Reply

Your email address will not be published. Required fields are marked *