Dung ki runar da u ijekshon ia ka khynnah skul ha Jaiaw Pdeng

Kawei ka khynnah kynthei kaba dang 16 snem ka rta, katba ka dang iaid lynti ban leit skul, kala shah dung da u injekshon ha ki 2 ngut ki runar kiba la sop la spain bad kah iala ka durkhmat bad mar ia dep kila phet krad. Haba iakren bad ka kmie jong kane ka khynnah, kala ong, ba katba ka khun ka dang iaid kjat ban leit sha skul, kumba ha ka por kumba 2 duna haba kala poi hajana ka ophis treikam jong ka Bible Society of India kaba don marjan bad ka Madan Students, Jaiaw arngut ki briew kiba la shong da ka scooty kiba la kah iala ka durkhmat kila dung kynsan ia ka da u injekshon bad mar ia dep leh ia kane kila phet krad noh bak na katei ka jaka. “Kitei ki 2 ngut kila shong da ka scooty bad kila dung kynsan da u injekshon na ka kti kamon bad phet krad noh mar ia dep hi. Ka khun jong nga kala leit mardor sha Dispensary kaba don ha Jaiaw Langsning bad na Dispensary kila phone ia nga ban wan mih noh mardor ba ka khun ka jong nga kala kem tlot kynsan. Hynrei namar ka jingbym don doctor la ialam noh ia ka khun sha Dr H Gordon Robert’s Hospital, Jaiaw ban phah sumar” la ong ka kmie.

Kala ong ba ka khun mynta ka dang don hapdeng ka jingshah sumar ha ki doctor bad kala iathuh ba ka king bha ka khlieh. Haba kylli kane ka khynnah kala shah dung da u injekshon aiu, ka kmie kala ong, ba haduh mynta kim pat lah ban tip kala shah dung da u injekshon aiu namar ba ki doctor kila leh ia ki test bapher bad ki dang ap ia ka kaiphod na ki doctor. Kane ka kmie kala dawa na ki bor sorkar bad ki pulit ba kidei ban tohkit bniah bad ban pynshitom da kaba tyngeh ia kine ki runar kiba la leh ia kane ka kam sniew khnang ba kan long ka nuksa ba kin ym nud shuh ban leit leh ia kiwei pat ki khynnah skul. Kala iathuh ruh ba ki pulit jong ka Lumdiengjri Police Station kila wan sha Hospital bad mynta ki dang pynlong ia ka jingtohkit halor kane ka jingjia.

Ki nongialam ka KSU Jaiaw Circle, haba kila ioh jingtip ia kane ka jingjia, kila leit mardor sha Dr H Gordon Roberts Hospital ban iakynduh ia ka kmie bad ia ki bahaiing ban pynpaw ia ka jingsngewkhia halor kane ka jingjia.