Durut ka kompeni ba pyntrei ia ka surok Shillong-Dawki

Ka kompeni ba pyntrei ia ka surok Shillong- Dawki ka la trei durut bad sngi bad miet namar ba ki iabeh ia ka aiom ba dang rang. Ha ka jingiaid lynti ki nongthoh khubor ha kine ki sngi la iohi ba ki pomshilum ki mashin ki la dem khui ban tih surok wat hapdeng shiteng miet haduh mynstep namar kane ka thain ka dei kaba jur slap bad lada kim ioh ban tih ban trei ha kum kane ka por ba rang kan shem jingeh ia ki ban pyntrei lada la wan ka aiom slap.Namar ka jingpyntrei ia ka surok, man ka sngi ki kali kiba wan kiba kiew na katei ka surok, ki la shah bat bun kynta namar ka jingtih ia ka surok bad kaba don ki jingma ban iaid ki kali, ioh hap ki maw.

Kane ka jingbat ia ki kali kadei harum ka shnong Laitlyngkot ha ka shnong Laitkynsew bad man ka sngi, ka la don ka jingbat shwa ia ki kali ha ka por ba ki puhshilum ki dang kiew sha riat, ban tih ia ki maw bad ka khyndew. Ka kompeni kaba pyntrei ia kane ka surok, ka la buh haduh kumba lai tylli ne saw tylli ki mashin tang ha katei ka jaka, ban pyntrei ban kiew ha ki riat ki ram ban pyntrei ia ka surok. Ia kane ka surok, la shna ha ka jingheh jong ka Two Lane bad la buh thong ban pyndep ha u snem 2026.

Lah ban kdew ba ia kane ka surok,  ka sorkar ka la mang ha ka jinglut kumba T.1600 klur eiei hapoh ka jingpeit jong ka National Highway and Infrastructure Development Corporation (NHIDCL) jong ka sorkar India.