Dawa ka JJACBI ba buh da ki Pulit Sot ha shnong Lapangap

Ka Jaintia Joint Action Committee Border Issue (JJACBI) hynne ka sngi ka la dorkhas ha u Symbud Myntri Rangbah ka Jylla u Bah Prestone Tynsong uba khmih ruh ia ka tnad kam pohiing (Police) ban phah mardor ia ki Pulit jong ka Special Force-10 (SF10) sha ka shnong Lapangap West Jaintia Hills ban ai jingiada ia ki nongshong shnong ka jylla kiba don ha katei ka thain. Kane ka Committee kaba kynthup ia ki nongialam shnong bad ki nongialam jong ki sengbhalang ha ka jingiakynduh ia u Bah Prestone Tynsong ka la pynpaw ba ka jingmih ka jingïakynad ka dei kaba la wanrah da ka Karbi Anglong Autonomous Council (KAAC) bad kiwei ki kynhun ïatreilang ba la khanglad ïa ki kam rep khamtam ha ka por thung bad ha ka por ot kba kumta ka long kaba kongsan bha ia ka sorkar ba kan pynjur ia ka jingpahara ki pulit ban ai jingiada ia ki paidbah bad ban tehlakam ban ym mih kano kano ka jingiakynad ha katei ka thain

Ka Committee kala kynnoh ruh ba ki Pulit ka jylla Assam ki iarap bad kyrshan ïa ki katto katne ki kynhun na ka jaidbynriew Karbi bad kane kala wanrah ka jingbym shngain hapdeng ki jaidbynriew Pnar kiba shong kiba sah ha ka shnong Lapangap bad ki shnong kiba marjan. Ka Committee ka la kyrpad ruh na ka Sorkar Jylla ban phah da ki Pulit SF10 ban ai jingiada na ka jingshah pyntieng, ban tehlakam iaka jingwan rung tuh bad ban tehlakam iaka jingshah khanglad ban trei iaki kam rep, ban wanrah biang bad pynneh ia ka jingsngewshngain hapdeng ki nongrep bad ki longing kiba don ha katei ka thaiñ. Ka Committee kala ai khublei ruh ia sorkar jylla bad ia u Symbud Myntri Rangbah ka jylla uba la shimkhia ban phah mardor ia ki pulit bad ia ki majistor ban tem ia ka jingiakynad ha ka shnong Lapangap na ka jingwan kyntur pud be-aiñ ki paid Karbi.

Ki la kyntu ia ka Sorkar Jylla ban leh kham kloi ban buh buh beit noh da ki Pulit SF10 ha ka por thung bad ot kba khnang ban iada ia ka hok, ka jingim jong ki paidbah jong ka shnong Lapangap. Kila iathuh ruh, naduh ba la mih ka jingiakynad ka sorkar jylla kala buh ia ki pulit ha katei ka thain ban ai jingshngain ia ki paidbah hynrei ka Committee ka kwah ba ka sorkar lada ka lah kan buh da ka Police Outpost kaba pura ha katei ka thain.