Ha India bun ki nongshong shnong 15-19 snem, ha Meghalaya 4 snem

U Myntri Rangbah ka jylla u Conrad K Sangma ula ia ka bynta kum u kongsan ha ka SPARK Summit 2025 ha Soso Tham Auditorium, Shillong hynne ka sngi ryngkat u Myntri pule puthi u Rakkam A Sangma, u MLA ka Kharkutta u Rupert M Momin, u Secretary ka tnad pule u Swapnil Tembe bad kiwei ki heh sorkar. U Conrad K Sangma haba kren ha ka jingialang ula ong, kiba bun tam na ki nongshong shnong hapoh ka ri India ki dei ki samla ha ka rta ba 15-19 snem bad ha ka jylla Meghalaya kiba bun dei ki briew ha ka rta ba 0-4 snem bad 49% ki nongshong shnong hapoh ka 20 snem ka rta. “Kane ka dei ka jingshisha jong ka jingtynjuh hynrei kaba don ruh ia ka lad bad ka prokram kum ka SPARK, Early Childhood Development Program, MPower, MGMP, YES Meghalaya, ki prokram kiba ia dei bad ki kam ialehkai baroh kine ki dei ki jingbei tyngka”.

U Myntri Rangbah ula ong, “Ka Meghalaya ka dei kawei na ki jylla kaba pynleit jingmut bha ha kaba iadei bad ka bynta jong ka jingim ha ki rta bapher bad ki la don ki prokram bapher kiba ia dei bad ka roi ka par jong ki khunlung, ki heprit, ki khynnah bad ki samla bad ka jingbei tyngka kaba ngi la leh ha kitei ki prokram kin sa pynmih ia u soh jong ka jingjop ha ki snem kiban wan”. Ha kaba iadei bad ki khynnah kiba don hapdeng jong ka rta kaba 9-19 snem, u Myntri Rangbah ula ong, ba kane ka dei ka por, kaba ki riew shimet ki mad ia kiba bun ki jingeh bad kine ki dei ki rta kiba donkam bha ban ioh ia ka jingbtin lynti, kumta da kaba iatreilang bad ka Avenues kaba la pyniaid shakhmat ia ka SPARK Program ban kyrshan, saindur bad iasyllok bad ki khynnah ba kin iaid shaphrang ha ka jingim ha ka lynti kaba dei, ban long kiba tbit bad ki nongshong shnong kiba don ia ka jingkitkhlieh.

U Conrad Sangma ryngkat bad ki heh sorkar ki la sam ruh ia ki Tablet sha ki ki khynnah kiba la wan shakhmat ha ki jingpule bad ia ki syrnod sha ki skul kiba la. ia shim bynta ha ka prokram jong ka SPARK ne ‘School Programs in Articulation, Resilience and Kindness’.