Ha ka General Meeting, yn shim rai ki Nonghikai SSA ia ki jubab ka Sorkar

Ka Meghalaya SSA Schools Association (MSSASA) kan shim ia ka rai ha ka 21 tarik Nailur 2024 haba iadei bad ka jubab ba la ioh na ka Sorkar Jyllla. Ka MSSASA kala pynbna ban pynlong da ka General Meeting ha ka 21 tarik Nailur ha Community Hall Raitsamthiah bad ka iawei ïa baroh, ki nonghikai ban iathir halor ki ar tylli ki jubab ba ka Sorkar Jylla ka jubab ia ka jingdawa pynkiew tulop jong ki palat 12541 ngut ki nonghikai SSA bad ban ai jingithuh ia ki nonghikai SSA hapoh ka Jylla. Haba kren sha ki lad pathai khubor ha ka sngi Thohdieng, u President ka MSSASA u Bah Aristotle Rymbai ula ong “Ngin sa iashim rai lang ha ka jingialang ban wan jong ka General Executive Council (GEC) ban long la 21 tarik Nailur, halor ka sienjam ba dei ban shim haba iadei bad ki jubab ba la ioh pdiang na u Director of School Education & Literacy (DSEL) bad State Project Director, Samagra Shiksha Abhiyan (SSA) Swapnil Tembe, ba iadei bad ka jingpynkiew tulop bad ai jingithuh ne thungkam pura ia ki nonghikai SSA”.

U Bah Aristotle u la pyntip ba ki Nongialam ka MSSASA kala iakynduh ia u Swapnil Tembe ha ka 10 tarik u Nailur. “Ha ka jingialang, u State Project Director ula pyntip ba ula ioh pdiang ia ka jingbthah na u Commissioner & Secretary ka Tnad Education ban buh shuwa ia mynta ia ka jingtyrwa ban pynkiew tulop ia ki nonghikai SSA” la ong u Bah Rymbai.

“Kaba ar, u State Project Director ula pyntip ia ka synjuk bad ka Tnad Education kala tyrwa ban rah sha ka jingialang jong ka Kynhun Myntri ba iadei bad ka jingthungkam pura noh iaki Nonghikai SSA” ula bynrap. Nalor kane, u Bah Rymbai ula pyntip ba ka synjuk kala buddien bha ia kine ki 2 tylli ki kam bad ka Sorkar hadien ka jingiashong kyllain mungor ba khlem pud, kaba long ha u bnai Naitung 2022. Katkum ka jingong jong u, ka synjuk ka la pynlong la bun tylli ki jingialang bad ka Sorkar ha ka kyrdan u Symbud Myntri Rangbah bad u Myntri ka Tnad Pule Puthi halor kine ki artylli ki kam.