Ha ka lyngkhuh sngi iap I Meiieid Spility, yn rakhe ka KSU ia ka sngi pyrshah Uranium

Ka Khasi Students Union (KSU) South West Khasi Hills District Unit, ha ka lyngkhuh sngi iap ba san jong i meiieid Spility Langrin ka 28 tarik, Risaw kan pynlong ia ka jingrakhe ia ka ‘Sngi Pyrshah Uranium’ ne ka Anti-Uranium Day.Ia kane ka jingrakhe ka seng ka la pynbna paidbah ba kan pynlong ha ka shnong Domiasiat, South West Khasi Hills District.

Ka seng ka la ong ba I meiieid idei iwei na ki riewshlur ban ieng pyrshah ia u uranium ha kaba I la kyntait ruh ia ka spah klur mynba ka sorkar India bad ka UCIL ka la tyrwa sha i na ka bynta ban ioh tih uranium.Ka KSU ka shim ia I meiieid Spility Lyngdoh Langrin kum iwei na ki nongialam ha ka jingiakhih pyrshah uranium naduh ki snem 1990 haduh ka sngi jingiap jong i.Ha katei ka sngi rakhe pyrshah uranium, ka seng ka shim ruh iaka jingpynskhem jingmut ha ka nongrim ba da lei lei ruh kan nym ailad ia ka jingpyrshang ban tih uranium haka thain Domiasiat bad Mawthabah.

“Ngi la pynskhem ruh ia ka rai ba ngin nym ailad ia ki Pre – Uranium mining activities ne kino kino ki kam ban iadei bad ka kam Uranium la ka long na ka sorkar jylla ne kino kino ki tnad naka sorkar India,” ong ka kyrwoh khubor na u Publicity Secretary ka KSU-SWKH u samla Macdonald Marbaniang.Ha kajuh ka por, ka seng ka la khot la wer ia baroh ki paidbah ban ia mih ryntih ha katei ka sngi ka 28 tarik ban wan sha ka shnong Domiasiat ha kaba kan don shwa ka jingialang ban rakhe ia kato ka sngi ha Domiasiat haka por 11:30 mynstep hashwa ban ia leit buh syntiew lang sha u lum jingtep jong i Meiieid Spility Lyngdoh Langrin.