Ha ka sien ba nyngkong eh, ioh khur ki khynnah ka skul Gorkha ia ka nam ba nyngkong ha ka resol jong ka Secondary School Leaving Certificate (SSLC) ba la pynbna hynne ka sngi da ka Meghalaya Board of School Education (MBOSE).
Ha kane ka sngi, ki khynnah ki nonghikai, ki la iashad iarisa ban pynpaw ia ka jingkmen ba pas bha ki khynnah ha kaba ki don haduh lai ngut ki khynnah kiba don ha ka thup jong ka Top Twenty.
Kine ki kynthup u Wangaal Lama uba ioh ia ka kyrdan 1st Position u ioh 585 mark, u Aaditya Thapa ha ka kyrdan ba 7th position u ioh 569 mark bad u Sharat Chettri ha ka kyrdan ba 8th Position u ioh 568 mark.
U Principal kane ka skul u Amit Thapa ula pynpaw ka jingsngewkmen ba ha ka sien ba nyngkong kane ka skul ka la iohbat ia ka kyrdan ba nyngkong ha ka eksam Matrik.
“Kane kadei ka sien ba nyngkong ba ka skul kan ioh ia ka kyrdan ba nyngkong ha ka resol SSLC bad kane ka long ka jingsah jingkynmaw ha ka histori jong ka skul,” ong u Principal.
Ula ai khublei ia ki khynnah ki nonghikai kiba la trei shitom ban wanrah burom ia kane ka skul.
Haba iakren bad kine ki khynnah, ki la pynpaw ka jingkmen bad ki la ai khublei ia ki kmie ki kpa bad kumjuh ia ki nonghikai kiba la ju kyrshan ia ki ha ka jingpule haduh ba ki ioh ia u soh ka jingjop.
U Wangaal ula pynpaw ka jingkmen namar ba ula pynkhreh bha ha ka eksam bad kaei kaba ula khmih lynti ban wan shakhmat ha ka resol, ka la urlong shisha.
Ula ai mynsiem ia kiwei ki par khynnah ba kim dei ban don jingartatien ialade, hynrei kidei ban trei shitom naduh ka mynsiem, bad dei ban don ka jingsngewtynnad haba pule kot khnang ban wan shakhmat.
Ula iathuh ba u ju sngewtynnad bha ban lehkai phutbol bad ban lehkai game ha ki mobile, hynrei na bynta ban pynkhreh bha ia ka eksam, ula iehnoh ia kine ki jingsngewtynnad jong u baroh.
U Wangaal ula iathuh ba ha kane ka eksam, ula pynkhreh kham bun na ka kot bad um khlem pyndonkam ia ka kot iarap ne ka CM Impact Guide Guidebook.
“Ban ioh ia ka pas mark, lah ban pule ia ki Guidebook hynrei lada phi kwah ia ka resol ba bha, dei ban pule ia ka kot,” ong u Wangaal.
Katba u Sharat Chettri ula pynpaw ka jingdiaw namar ka jingshim sting jong u, ka la pyllong ia u ban ioh ia ka 8th position. Ula bynrap ba lada dei ba u shim khia tikna ula lah ban kham poi sha ka kyrdan ba kham shakhmat ia kane.
Ula pynpaw ba u don ka jingsngewtynnad ban shet bad udon ka jingkwah ban long kum u nongshet (Chef) hadien habud.
“Lada dei ba nga khreh kot kham bha shuh shuh, nga lah ban poi sha ka kyrdan ba shakhmat,” la pynpaw u Sharat.
Na ka liang u Aaditya Thapa, ula pynpaw ka jingkmen ba u la ioh ia ka resol ba bha.
Ula ai mynsiem ia kiwei ki khynnah ba kidei ban don ka jingkut jingmut bad ioh ia kaei kaba ki kwah.