Ha kajuh ka sngi, plie u Bah Methodios 2 tylli ki Sub Centre ha thain Maweit

Ka ophis jong ka District Medical Health Officer West Khasi Hills District ha ka 11 tarik u Nohprah 2025 ka la ïoh ban plie paidbah noh ia ki 2 tylli ki Sub Center ha ka thaiñ Maweit kynthup ïa ka Wahlyngdoh Sub Centre bad ka Risiang Sub Centre. Ïa kitei ki 2 tylli ki jaka sumar nongpang la wan ban plie paidbah da u bah Methodius Dkhar myntri ka Food Civil Supplies & Consumer Affairs Department kum u kongsan, bad la synranlang ruh da u bah Srally Rashir MDC ka Mawshynrut kum u symbud kongsan, kumjuh u bah C.P.Mawkon Additional Deputy Commissioner, i Dr. Meribha K Sohliya, DM&HO WKH bad kiwei kiwei. U bah Methodius kum u kongsan u la ïoh ban plie pyrda ruh ïa u Mawsahnam jong kitei ka jaka sumar nongpang bad ha kajuh ka por u la ïoh ruh ban khap ïa u ribon kum ka dak jong ka jingplie paidbah ia katei ka jaka sumar.

Ïa kitei ki Sub Center la tei lyngba ka jingbei pisa na ka scheme jong ka PM-ABHIM NHM ha ka jinglut kaba la kot sha ki 55 lakh tam kawei kawei ka Sub Centre, bad la pyntrei lyngba ka Village Health Council jong ka shnong Wahlyngdoh bad ka shnong Risiang. Lyngba ka Wahlyngdoh Sub Centre, kin don palat 9 tylli ki shnong ki ban  ïoh jingmyntoi, katba ka Risiang Sub Centre pat kan ai jingshakri ïa u paidbah jong ki 14 tylli ki shnong ha katei ka thaiñ. Ki riewrangbah jong kitei ki shnong haba ai jingkren ki la pynpaw ruh ba ka jingioh ia kane ka Sub Centre ka la long ka jingkyrkhu kaba khraw ïa ki paid nongshong shnong jong katei ka thaiñ hi baroh kawei ha kaba nangne shakhmat, kin ym don kam shuh ban leit phah sumar shaduh ka ïew Maweit lane shaduh sha sor Nongstoiñ namar ba ki la don la kajong ka jaka sumar nongpang kaba khamjan.

Na ka liang u Bah Methodios Dkhar u la pynpaw ba ha ki snem ki ban wan, ka Mawshynrut kan sa ioh biang ia ki katto katne ki Sub Centre na ka bynta ki shnong bapher bapher hapoh ka Constituency. U la ong ba nalor kiwei kiwei ki kam pynroi hapoh ka Constituency, u la buh ia ka koit ka khiah kham shakhmat na ka bynta ka jingmyntoi ki nongshong shnong. U la pynsngew ruh ba hapoh ka thain Maweit, kin don sa artylli ki Sub Centre kiba la ioh ia ka mang tyngka bad kine ki kynthup ia ka Mawmarin Sub Centre bad ka Shyrkon Sub Cebtre.