Ha ki 52 snem ka sien kaba nyngkong ba ki paid Mawlai ki mad jingeh : PT Sawkmie

U Bah PT Sawkmie, MLA barim u la pynpaw ba ha ki 52 snem ka jylla Meghalaya ka la iaid ha ka sien kaba nyngkong ba ki paidbah nong Mawlai ki la mad jingeh bha. U la pynpaw bad khlei ia kine ki kyntien ha ka jingrakhe ia ka Advance Khristmas ba la pynlong da u bah PT Sawkmie bad ka longiing ha ka jingdon ryngkat ki paidbah nong Mawlai ha ka prokram kaba ki la pynlong ha Indoor Sports Hall, Mawlai Phudmuri ha ka 07 tarik u Nohprah, 2024. Ha kane ka jingrakhe la ia don lang ki dkhot ka Dorbar Shnong Mawlai Phudmuri, naduh u Rangbah shnong bah S. Khongkliam bad kiwei, ki Phadar ka Mawlai Parish bad ki paidbah na ki dong bapher bapher ka Mawlai Konstitwensi.

U pynpaw ba kat shaba phai ki paidbah ka Mawlai Constituency ki mad jingeh  da ka jingud da ka jingnam, da ki jingjynjar bad jingshitom suda. Kum u kpa trai u ong ba u tip ia ka duk ka suk jong ki paidbah. Kumta u pynpaw ba ha kane ka kynti bamynta ki paidbah nong Mawlai ki dei ban ieng tylli ban wanrah ia ka jingkylla. Ha kajuh ka por u bah SAwkmie u la ai khublei Khristmas bad snem thymmai basuk bad bakmen ia baroh.

Ha kane ka sngi la ioh ruh ia ka jingkren na bah L. Mylliem Umlong, uba la pynpaw ba ki paidbah nong Mawlai kim ju pynjop MDC na kajuh ka parti. U pynpaw ruh ba u sakhi ia ka jingieit u bah PT Sawkmie ban shakri, naduh ba u rem u khlem sangeh ka shakri ia ki paidbah bad u iai bteng tad haduh kine ki sngi. Ha kane ka sngi u Bah Sawkmie u la ai ruh ia ki jingai sngewbha Khrsitmas sha ki katto katne kiba la jied da ka shnong Mawlai Phudmuri.