Ha ki saw bnai, kurup ki BSF ki mar ba T.11.70 klur, shah kem 115 ngut

Ki shipai iada khappud Border Security Force (BSF) Meghalaya tang hapoh 4 snem jong u snem 2025, ki la ioh kem 78 ngut ki nong Bangladesh bad 37 ngut ki nong India kiba donkti ha ki kam khaii tuh ha u pud u sam ka Jylla. Nalor kane ki BSF ki la ioh kem ruh ia 6 ngut ki nong India ba donkti ban iarap ia ki nong Bangladesh ban jam sha u pud u sam ka Meghalaya. Hapoh 4 bnai jong u snem 2025, ki BSF Meghalaya ki la ioh ruh ban kurup bun jait ki mar kum u Ganja, kiad, ki jingtah pynbha briew, ki jain bad kiwei kiwei bad 750 ki masi ba shongdor ym duna T.11.70 klur ba thmu shalan tuh sha Bangladesh. Ka kywroh na ki shipai BSF, ka kdew ba ki BSF kin iai bteng ia ki kam ban iada ia u pud u sam ka Jylla la ka dei naka jingwan rung beain ki briew ne ban tehlakam iaki kam khaii tuh ha ki thain khappud.

Ki BSF Meghalaya naka por shaka por ki pynlong ruh ka jingiakynduh lang bad ka Border Guards Bangladesh (BGB) Bangladesh ban iathir halor ki sienjam ban shim ban iada iala u pud u sam bad ban tehlakam iaki kam beain haki thain khappud. “Hadien ka jingtohkit la lap ksai iaki lynti lane ka jingiadon bynta ki trai Ri ban iarap iaki nong Bangladesh ban rung shapoh ka Jylla bad sha kiwei ki Jylla ka Ri bad ia kine ki jingtip la iasam bad ki bor Sorkar Jylla ban leh katkum ka jingdonkam ban pynthikna ba kan nym don shuh ka jingwanrung beain ki briew shapoh ka Jylla” la ong ka kywroh naki BSF.

Nalor ki kam ban iada ia u pud u sam, ki BSF kila pynlong ruh bun tylli ki prokram ban pyniajan hapdeng ki shipai bad ki nong shong shnong haki thain khappud jong ka Meghalaya. Ha ki 4 bnai jong 2025, ki BSF kila pynlong man ka por ki jingia jingsumar ei iaki paidbah, ki la pynlong 13 sien ka  blood donation camp bad 22 sien ki Civic Action Programs nalor ka jingsam tiar ba donkam ia ki nongshong shnong.