Ha Ri Bhoi poi iuh kjat ka Myntri Sorkar pdeng ka Annapurna Devi

Ka Myntri Sorkar pdeng ba dei khmih ia ka Tnad Women and Child Development, ka Annapurna Devi ka la leit jngoh ia ka Ri Bhoi District, mynta ka sngi ban peit bniah ia ka jingpyntreikam ia ki sienjam bapher bapher ba iadei bad ka jingkyntiew ia ki longkmie bad ki khynnah bad lum jingtip shaphang ka jingiaid shaphrang ka thain hapoh ki skhim ba bei tyngka ka sorkar pdeng. Kum shi bynta ka jingleit jong ka, ka Myntri ka la sdang da ka jingleit jngoh ia katto katne ki shnong ha ka district ha kaba ka la iakren bad ki longiing ha ka Transit Home bad iakren ruh bad ki longkmie ba armet ha ka Primary Health Centre ha Byrnihat. Ka Annapurna Devi ka la leit jngoh ruh ia ka Anganwadi Centre ha shnong Saiden, ha kaba ka la iakren bad ki nongpeit ia ka centre bad ki khynnah kiba pule ha ka preschool bad ki kam and Supplemental Nutrition Programme (SNP). Hadien kane ka Myntri ka la peit bniah ia ka jingpyntreikam ia ki skhim bad iakynduh bad ki nongmihkhmat na baroh ki tnad bad ki bor pyniaid district ha DC Conference Hall ban peit bniah ia ka jingpyntreikam ia ki skhim jong ka sorkar pdeng.

Ki jingiakren ki kynthup ia ki jingeh, ki jingjop bad ka jingiaid shaphrang ha ka jingtreikam na ka bynt ki thong ha u snem, ryngkat bad ka jingmang tyngka bad ka jingpyndoinkam ia ka pisa na ka NITI Aayog bad ka North Eastern Council (NEC), bad kiwei kiwei ki skhim bad ki sienjam.  Ka Myntri ka la iaroh ruh ia ki sienjam jong ka sorkar jylla, ba kynthup ia ka Early Childhood Development Mission bad ka Chief Minister’s Safe Motherhood Scheme (CM-SMS), kaba pynthikna ban rah shakhmat ia ka kam. “Kane ka sienjam jong ka sorkar kadei kawei na ki rukom treikam ba biang bad ngin peit kumno lah ban pynbud ia kane ha kiwei kiwei ki aspirational district jong ka ri ban kyntiew shuh shuh ia ka koit ka khiah jong ka kmie bad i khunlung.” Ka Annapurna Devi ka la pynpaw ka jingsngew hun ia ki jingjop jong ka district da kaba ong, “ki dak ha kaba iadei bad ka Ri Bhoi Aspirational Distrik ki long kiba ai mynsiem bha. Mynta, ka district ka don ha ki kyrdan ba kham halor ha ki dak kiba iadei bad ki longkmie bad ki khynnah. Ka la pynthikna ruh ban weng ia ki jing duna ha katto katne ki dak bad pynbeit ia ki jingeh kiba la pyni ha kane ka jingialang. Ka Myntri ka la iaroh ia ki sienjam jong ki ophisar ka jylla bad pynthikna ka jingkyrshan jong ka sorkar pdeng, da kaba ong ba kan rah shakhmat ia ki jingtyrwa bad pynthikna ban buddien.

Haba kren shaphang ka jingphaikhmat jong ka sorkar pdeng ha kaba iadei bad ka thain shatei lammihngi hapoh ka jingialam jong u Myntri Rangbah duh Narendra Modi, ka Myntri ka la ong, “Mynta, u Myntri Rangbah duh Narendra Modi u la peit bniah ia ka thain shatei lammihngi, bad la iatrei lang da baroh ki tnad kynthup ka tnad women bad child development.” Ha kaba kdew sha ka jingjop jong ka Aspirational Districts Programme (ADP), ka Myntri ka la ong ba namar ki sienjam ba khlain hapoh ki distrik ba shah ieh bein ha ki por mynshuwa, kynthup kito kiba don ha ki jaka kyndong, ki la wanrah ia ka jingjop ha kaba iadei bad ka jingkyntiew ia ki dak ka roi ka par. Ki ophisar na ka sorkar jylla bad sorkar pdeng ki la iadonlang ha kane ka jingialang, kynthup ia u Sampath Kumar, Principal Secretary, tnad ka koit ka khiah, sorkar Meghalaya, u Pravin Bakshi, Commissioner & Secretary, tnad Social Welfare, sorkar Meghalaya, u Abhilash Baranwal, Deputy Commissioner Ri Bhoi, Dr Ankita Chakravarty, PS sha ka Myntri Tnad Women and Child Development, sorkar India, ka Malika Pandey, APS sha ka Myntri WCD, u Ram Puneet, Language PA sha ka Myntri, WCD, u Kumar Gaurav, Under Secretary sha ka Tnad WCD, bad kiwei kiwei.