Ha u Jylliew yn pyndep ia ka Iing Dorbar thymmai ha Mawdiang diang

U Lamphang ka iingdorbar thawaiñ ka jylla u Thomas A Sangma hynne ka sngi ula lum ia ka jingialang ban peit ia ka jinglong jingman ha kaba iadei bad ka jingtei ia ka iingdorbar thawaiñ ba thymmai ka jylla bad u la pyntip ba yn pyndep ia kane ka projek ha u bnai Jylliew jong u snem ban wan.

Ha kane ka jingialang la iadonlang u Symbud Myntri Rangbah ka jylla u Bah Prestone Tynsong uba khmih ia ka Parliamentary Affairs, u Bah Cyril V. Diengdoh u Commissioner and Secretary ka Parliamentary Affairs Department bad u Bah Andrew Simons u Commissioner and Secretary jongka Meghalaya Legislative Assembly bad kiwei kiwei ki heh ophisar.

Hadien ba la lum ia katei ka jingialang u Lamphang ula iathuh ba la buh por ban pyndep ia kane ka jingtei ha u Bnai Jylliew 2026 bad ha kaba nyngkong la buh thong ban pyndep ha u Lber 2025, hynrei ki nongshna kiba dei ban shna ia ki bynta kiba shapoh jong ka iing dorbar kila pan por ban pynjlan sa 6 bnai ban pyndep ia ki jingshna kiba kynthup ia ka Main Hall, Reception bad ka Lobby.

U Lamphang ula ong ruh ba yn lum ia ka jingialang man la ka bnai bad ia ka jingialang kaban wan yn sa pynlong ha ka 8 tarik u Nohprah 2025 bad ula pynpaw ia ka jingkhmih lynti bai aka Dorbar Synrai kaban wan yn sa pynlong noh ha ka iingdorbar thawaiñ kaba thymmai ha u snem 2026.

U Lamphang ula pynpaw ba ha ka iingdorbar ba thymmai kan don ia ki kor ki bor kiba thymmai bad paka, ka jingpyndiat ia ki kor ha kaba iadei bad ka jingshngain bad kiwei kiwei ia kaba ka donkam ban pynwandur bha bad ka jingiatreilang bad ula ong ba ka jingpynslem ban pyndep ia kane ka projek kan ym ktah satia ha kaba iadei bad ka jingpynlut pynsep.

Ula pynapw ruh ia ka jingsngewhun ha kaba iadei bad ka rukom shna thymmai biang ia u Dome bad ia kane ka jingpynwandur kaba thymmai kadei kaba la leh ban pynduna ia ka jingkhia jong ka tnum bad kadei kaba la khmih bniah da ka IIT Guwahati bad IIT Roorkee.

Ula bynrap ba la pynkhreh ia ka DPR na ka bynta ka wat ka baar, kaban kynthup ia ka jingtei ia jaka sah jong ki nongtrei ne Staff Quarter bad kiwei kiwei ki jingdonkam bad la phah ruh ia ki jingtip sha ki tnad jongka sorkar pdeng na ka bynta ban ioh ia ka jingmynjur.