Haba don ka thong dei ban trei shitom: ong ka Nelly Mary Khymdeit

Ka St. Paul Higher Secondary School, Nongpoh sa shisien pat ka la mih paw biang ha ka thup kaba shakhmat eh ha ka result ba la pynbna da ka Meghalaya Board of School Education (MBOSE) ha kaba ka samla Nelly Mary Khymdeit ka la ioh ban kot sha ka thup ba ar jong ka top 10 ha ka result jong ka Higher Secondary School Leaving Certificate (HSSLC) ha ka Arts Stream da kaba ioh ruh haduh 451 marks. Lah ban kdew ruh, ba ka samle Nelly Mary Khymdeit na St. Paul Higher Secondary School Nongpoh kaba dei ka khun jong ka Kong Sabina Khymdeit bad u (L) Dominic Ral Dkhar na ka shnong Saiden, ka dei tang ma ka kaba la kot shaduh katei ka thup ha Ri Bhoi District bad kaba la ioh ruh ia ki letter marks ha ka subject English, Khasi, Sociology, Political Science, Home Science, bad Education.

Naka liang ki bor pyniaid Skul da ka jingkmen kaba khraw bad ka jingsngew sarong ki la pdiang burom ia ka samla Nelly Mary Khymdeit naduh na khyrdop ka skul ban pdiang burom ia ka da ka Principal ka Anjelina Ch Marak, ki Nonghikai bad ki khynnah skul kiba la ai burom ruh da ka jain bad syntiew. Na ka liang ka samla Nelly Mary Khymdeit, ka la pynpaw ia ka jingsngewkmen kaba khraw halor ka jingjop jong ka ban kot shaduh ka kyrdan ba-ar ha ka thup top ten bad ka la ai khublei kyrpang ia la ki bahaiing hasem, ki nonghikai bad kiwei kiba la don bynta ban ai mynsiem bad pynshlur ia ka ban kot sha katei ka thong. Ka la ong ruh, ba kum ki samla pule kiba angnud bad kiba don ia ka thong ban kot sha ki kyrdan kiba shajrong ki dei ban treishitom bad len lade nalor ka jingpynleit jingmut beit triang ha ki jingpule, watla ka jingiaid lynti kam long kaba suk hynrei da ka jingtreishitom ka la ioh ban kheit ia u soh ba thiang ka la ong, da kaba kyntu ruh ia kiwei ki samla pule ba kin treishitom bad aiti met ban mynsiem ha ki jingpule jong ki.

Haba pynpaw ia ka jingkmen bad jingsngew sarong, ka Sr. Anjelina Ch Marak, kum ka Principal, lem bad u samla Boniphast Khymdeit kum u hymmen ki la pynpaw ia ka jingsngewkmen kaba khraw halor ka jinglah jong ka samla Nelly Mary Khymdeit ban poi sha ka thong, da kaba ong ruh, ba ka dei ka jingsngewsarong ymtang ia ki bahaiing hasem, hynrei ia ka Skul hi baroh kawei, ki nonghikai bad ia ka shnong Saiden hi baroh. Ki la kitbok kitrwiang ruh, ia ka samla Nelly ba kan nang bteng ban minot ia ki jingpule ha ki kyrdan kiba kham shakhmat, khnang ba kan nang ioh ban kheit ia u soh ba thiang ha ka lawei ka jong ka.