Hadeng ka jingartatien kiba bun balang, mynjur ka Iing Dorbar ia ka Amendment ka MSIPFA

Ka Iingdorbar hynne ka sngi ka Palei ka la mynjur ia ka jingpynkylla ne Amendment ia ka Meghalaya State Investment Promotion & Facilitation Act, 2025 wat hapdeng ka jingartatien kiba bun balang namar ka jingpynkylla ia kane ka ain ka lah ban ktah ia ka jinglong trai ia ka khyndew ka shyiap. U Myntri Rangbah ka Jylla u Conrad Sangma ula iathuh ha ka iing ba la weng noh ïa ka section 4 kaba kdew ‘ban thaw ïa ki Land-Bank lyngba ka jingthied beit ïa ki jaka ne da kiwei pat ki lad (creation of land-banks through direct purchase of land or other means)”.

Ula pynshai ha ka iing ba kane ka ain ym iaid lait ia ki Distict Council, ki bor synshar hima, ki shnong bad kam lah ban iaid lait ia ka Meghalaya transfer act, 1971. Ula ong ia kane jingpynkylla la leh hadien ka jingiamir jingmut ha ka kynhun myntri, ki MLA ryngkat ki ophisar ka jylla bad ki kynhun sngewbhalang bapher bapher, khnang ba kan ym don ka jingktah ia ki trai ri kiba longtrai ia ka khyndew ka shyiap bad ula pynthikna ba sorkar kan ym long pyrshah ia ka mon ki paidbah bad dei halor kane ka nongrim ba ka sorkar ka lah ban wanrah bun ki kam pynroi ban kyntiew ia ka roi ka par ha Jylla. U bah Ardent Basaiawmoit MLA ka VPP haba wanrah ia ka mat ban iatai ha ka iing ba ka jingpynkylla ia ka Investment Bill kam dei ban ktah ia ki trai ri trai muluk bad ula ban jur ia ka jingdonkam ban iada ia ka jingmyntoi jong ki paidbah ka jylla.

U la ong ka sorkar ka dei khang lad noh ia ka jingthied jaka shim jaka kaba pynduhnong ia ki trai ri.   Haba shim bynta ha ka jingiatai u nongialam ka liang pyrshah u Dr Mukul Sangma uba la ong, ka jingpynkylla ia ki Bill ne ka ain kam dei ka dei iada bad ai jingmyntoi ia ki trai ri ha ka ioh kam ioh kam bad kam dei ban pynjot ia ka mariang bad ki paidbah. Ha ka jingiatai hynne ka sngi la shim bynta da ki MLA ka liang pyrshah bad kumjuh MLA ka liang synshar kiba la iaroh sorkar hapoh ka jingialam u Myntri Rangbah u Conrad Sangma halor ki kam pynroi na bynta ka jingmyntoi ki paidbah ka Jylla.Hadien ba ka sorkar ka la mynjur ban pyndam noh ia ka bynta kaba iadei bad ka jingthaw ia ki Land Bank, u bah Ardent ula mynjur ban weng noh ia ka jingpyrshah pynkylla bad ka iing dorbar ka la mynjur ia katei ka Bill hynne ka sngi.