Hadien 18 snem ioh bording biang ka Pahamjula ba leit jurip u MR

Ki paidbah nongshong ka Pahamjula kawei na ki shnong ba dang sahdien bha ha ka liang ka roi ka par mynta ka sngi ki la pynpaw ia ka jingkmen kaba khraw ia ka jingshimkhia jong u Myntri Rangbah ka jylla bad u MLA ka Jirang Constituency ban hiar sha katei ka shnong ban pynurlong noh ruh ia ka jingdonkam ia ka bording ilektrik ha kane ka shnong hadien ka jingshong dum kaba la palat 18 snem eiei. Lah ban kdew ba kane ka shnong Pahamjula kaba don kumba 77 ngut ki nongshong shnong, ka dei ka shnong kaba la shongdum la palat 18 snem eiei kata naduh u snem 2007 hadien ka jingbthei jong u transformer, nalor ka jingshong dum kane ka shnong ka dang sahdien ruh naduh ki iingskul kiba paka, ka surok ban poi sha ka shnong nalor kiwei kiwei ki kam pynroi.

Ha kane ka jingleit hiar jong u Myntri Rangbah ka jylla u Conrad K Sangma sha katei ka shnong ba la shimkhia hi da u MLA ka Jirang Constituency u Bah Sosthenes Sohtun, la synranlang ruh da u Deputy Commissioner ka Ri Bhoi District u Abhilash Baranwal, u Project Director ka tnad DRDA u Bah Raja Brahma nalor kiwei kiwei ki heh officer. Haba kren ha kane ka sngi, u Bah Sosthenes Sohtun kum u nongmihkhmat paidbah ka Jirang Constituency, u la pynpaw ia ka jingsngewnguh kaba khraw halor ka jingsngap ka sorkar jylla ba la lamkhmat da ka party NPP khamtam ka jingiohi jngai jong u Myntri Rangbah ka jylla ban pynioh biang ia ka bording ilektrik ha kane ka shnong hadien ka jingshong dum la palat 18 snem eiei bad ka jingwan iuhkjat dalade sha kane ka shnong ban phaikhmat ia ki jingeh ba mad da ki nongshong shnong.

Kum u nongmihkhmat paidbah, u Bah Sohtun u la ai khublei kyrpang ia ka sorkar jylla kaba la phaikhmat kyrpang ia ka Jirang Constituency kaba dei ka constituency kaba sahdien bha ha kine snem kiba la dep hynrei ha kine ki 7 snem kane ka sorkar jylla ka la lah ban theh ia ki kam pynroi bapher bapher kaba la kot yn jin shuh ia ka 600 klur tyngka khamtam ka jingpynmang ia ka surok NEC na 9 Mer terter shaduh Umsen kaba la pynmyntoi shikatdei ia u paidbah kane ka thaiñ. Na ka liang u Myntri Rangbah ka jylla u Conrad K Sangma, u la pynpaw ia ka jingkmen ban ioh pynurlong ia kane ka jingthrang jong ki nongshong shnong ka Pahamjula kiba la shongdum kumba 18 snem ban mad ia ka jingsangsot namar bym don bording ilektrik nalor ki jingeh kiba bun ha kaba u la bynrap, ba ka jingshah iehnoh bein jong ki Shnong ha kane ka thaiñ ka long ka bym lah ban pdiang bad kane ka sorkar jylla ka don ia ka thong ban sngap bad ban weng ia ki jingeh jong ki paidbah. U la pynpaw ruh, ba u sngewhun shikatdei eh ban ioh ia ka lad ban wan ia kynduh markhmat bad ki nongshong shnong ka Pahamjula ban sngap ia ki jingeh jong ki bad ruh ia ki shnong ba marjan namar ki dang don shibun ki jingduna, kumta na ka liang ka sorkar jylla hi ka buh ia ka thong ban pynbit pynbiang ia kine ki jingdonkam da kaba peit kyrpang ia kito ki jingdonkam kiba kham kongsan bad kiba donkam hakhmat eh.