Hadien 2 snem ba buh mawnongrim ioh ïingskul thymmai ka shnong Ammutong

Hadien ar snem ka jingbuh mawnongrim naka bynta ban tei iaka ïingskul thymmai ka Ammutong Govt L.P School kaba hap hapoh ka Amlarem Civil Sub-Division da u MLA ka thaiñ u Lahkmen Rymbui haka mang tyngka ba 44 lak, mynta ka sngi ka 17/04/2025 kala long ka sngi ban sah kynmaw bad ba pynkmen ia u MLA, ki nonghikai, ki khynnah skul bad baroh ki nongshong shnong ka Ammutong namar ba mynta kila ioh ban daka ïingskul thymmai.  Bad ia kane ka ïingskul thymmai ruh la wan ban plie da u MLA ka thaiñ hi u Lehkmen Rymbui ryngkat ka jingdonlang u Medling M Swer MDC ka War East, u Comfort Lamin incharge SDSEO Amlarem Sub Division, ki paidbah nongshong shnong, nalor ki nonghikai ki khynnah skul bad kiwei. Ha kane ka juh ka sngi u Lahkmen Rymbui ula plie ruh iaka ïing Hall ka shnong Ammutong kaba la shna haka jinglut ba 25 lak lyngba ka Border Areas Development kaba hap hapoh ka SCA (BADP) 2019-2020 ADDL. 

U Lahkmen Rymbui haba ai jingkren u pynpaw ka jingkmen ba la dep ia kane ka skul, bad nalor ba kila ioh mynta iaka ïingskul ba paka, kala iarap ruh iaki khynnah ban ioh pule haduh klass 5 ha kane ka skul, khlem da donkam leit shuh shaki skul ba jngai namar mynshwa naka daw ba khapngiah iaka klas ba 5 kila hap leit pule noh shabar.U kyntu iaki nonghikai ki khynnah skul ban long kiba iatreilang naka bynta ki jingkylla, ba naka liang ka sorkar ruh naka por sha ka por kala pyrshang ban pynbiang ki ïingskul ki salabus, ban ai ki training iaki nonghikai, ban thung nonghikai haki jaka ba thylli nalor kiwei ki lad ki lynti, bad kan dang iaibteng shakhmat. Ha kajuh ka por u ong ym pat lah ban leh lut baroh , dang don shibun ki jingdonkam, kumta u kyntu iaki paidbah ban ai jingmut shaka sorkar nalor ban iatreilang naka bynta ban kyntiew iaka Jylla.

Ula bynrap ruh ba hapoh ki 7 tylli ki snem 40 tylli tam ki skul hapoh ka Amlarem kiba ioh ïingskul thymmai lyngba ka tnat education, border area lyngba ka MLA skhim bad kiwei de ki tnat sorkar. Ha kajuh ka por u Lahkmen Rymbui ula pynbna paidbah ruh ba naka bynta ka hall ha Sub Division Amlarem la ioh iaka mang pisa ba 3 klur 45 lak bad  ym slem shuh  yn buh maw nongrim  khnang ban ioh sdang kloi rka jingpyntrei naka  bynta ki jingmyntoi u paidbah hapoh ka constituency Amlarem.