Hadien 31 snem, ïoh ka Mynthong T.21 lak na u MP, MLA bad MDC ban shna ïing dorbar Thymmai

Ha ka 4 tarik Kyllalyngkot ka long ka sngi ban sah kynmaw ia ka shnong Mynthong Jowai hadien 31 tylli ki snem ka jingpyntynlun ia ki kam shnong kam thaw hapoh ka ïing dorbar barim, ka la ioh ban plie mawnongrim na ka bynta ban shna pynheh noh ia ka iing dorbar lyngba ka jingioh iarap pisa na u MP Rajya Sabha T.10 lak na u MLA ka thaiñ T.10 lak bad na u MDC ka thaiñ T.1 lak.  Ia une u maw nongrim la wan ban plie ruh da u Dr.W.R.Kharlukhi MP Rajya Sabha kum u kongsan u Wailadmiki Shylla MLA ka thaiñ uba long ruh u chairman ka MUDA kum u symbud kongsan ha ka jingdonlang u MDC ka thaiñ u Lakhon Dkhar, nangta  u Dolloi ka Elaka Jowai u Puramon Kynjing, u BDO ka Thadlaskeiñ u H.Ñiang, u Chairman ka Jowai Municipal Board u P.Lyngdoh bad kiwei. Katkum ka jingpyntip na u waheh shnong u L.Pohktai u iathuh ba ka mang pisa naka bynta ban shna pynheh iaka ïing hall kumba la pynwandur ka la khynjoh shaka 1 klur 90 lak,  ka pisa bala ioh naka bynta ban sdang noh ka jingpyntrei ba nyngkong dei 23 lak, ha kaba naka jingioh iarap bala khynjoh 21 lak lyngba u MP, MLA bad MDC, 2 lak pat dei ka fund ba pynmih hi ka shnong.  U Wailadmiki

Shylla haba kren kum u symbud kongsan u ong, kane ka sngi ka long ruh kum ka dak jingiatylli iatreilang naduh ki longshwa haduh kiba mynta ryngkat bad ka shnong ka thaw.   Bad ym dei ruh ban duh mynsiem watla poi ka mang pisa ban pyndep haduh 1 klur 90 lak, hynrei dei ban pyntrei shwa khyndiat  khyndiat katba nangioh namar kam dei kaba suk ban ioh  syndon kumba la mang.U kyntu ruh ban nangiaid  shakhmat ka jingpyntrei lyngba ka 23 lak bala ioh katba ma u pat kum u MLA un nangwad lad wad skhim shuh shuh da kaba khmih lynti ba ynda lut ka 23 lak yn ioh biang ki skhim. U la pynkynmaw ruh da kaba ong, kane dei  ka ïing jong baroh lang, donkam ban iatreilang naka bynta ban kyntiew  iaka bad kumjuh ruh iaka shnong ka thaw wym ban  don ka jingsngew iapher naki daw ïing daw sem,  ka daw shimet ne ban don ka jingsngew iapher politic. U la ai nuksa ialade da kaba ong, ba ma u hi mar ia kut ka election u  wad lad kumno ban wanrah ki skhim pynroi hapoh ka constituency ban myntoi ia baroh lang,  ym tang naka bynta kiba thep vote sha u.

Ha kajuh ka por u khot ka  jingiatreilang naka bynta ka khuid ka suba,  ba kumba sdang u snem thymmai, dei ban pynthymmai ruh iaka pyrkhat pyrdaiñ khnang ban lah wanrah iaka jingkhuid.Na ka liang u kongsan u Dr.W.R Kharlukhi kum u briew bala kha la heh la san ha Jowai, u pynkynmaw iaki por bala leit bad  kumjuh ruh ka jingieid jingkyrshan ba ula ioh naki paidbah ka shnong Jowai, ka Rilum Jaiñtia bala pynlong ia u ban poi haduh kane ka kyrdan. Kumta ka jingai skhim pat u sngew ba dei ka kamram jong u hi, ba lada um ai iaka shnong jong u hi ula dei u briew ba khlem raiñ tam.U iathuh ruh ba ula ialeh ban iarap ia ka shnong ka thaw jong u katba lah, wat ha i jingioh barit ba 5 Klur naka bynta baroh ka Jylla.Bad katba lah  shwa ban kut ka samoi jong u kum u MP un ai bhah mar khyndiat haki bynta ka shnong Jowai.